پاشنيوه‌ڕۆى ئه‌مڕۆ دووشه‌ممه 2022/9/19 به‌ڕێز نێچيرڤان بارزانى سه‌رۆكى هه‌رێمى كوردستان له له‌نده‌ن، دواى ته‌واوبوونى ڕێوڕه‌سمى پرسه‌ى شاژنى كۆچكردوو ئێلێزابێسى دووه‌م له وێستمينسته‌ر ئابێ له په‌رله‌مانى شانشينى يه‌كگرتوو، به‌شدارى له ڕێوڕه‌سمێكى پێشوازيدا كرد كه له‌‌لايه‌ن به‌ڕێز جه‌يمس كلێڤه‌رلى، وه‌زيرى ده‌ره‌وه‌ى به‌ريتانياوه بۆ به‌شدارانى ڕێوڕه‌سمه‌كانى پرسه و ماڵئاوايى له شاژنى كۆچكردوو له چێرچ هاوس له له‌نده‌ن ساز كرا. تيايدا سه‌رۆك نێچيرڤان بارزانى پرسه‌نامه‌يه‌كى بۆ كۆچى دواييى شاژنى كۆچكردوو له تۆمارى پرسه‌دا نووسى.
له ميانى دوو ڕۆژى سه‌ردانه‌كه‌يدا بۆ له‌نده‌ن كه له‌سه‌ر بانگهێشتى فه‌رميى حكوومه‌تى به‌ريتانيا بوو، سه‌رۆك نێچيرڤان بارزانى له‌گه‌ڵ سه‌ركرده و ڕێبه‌رانى وڵاتانى جيهان به‌شدارى له پرسه و ڕێوڕه‌سمى دوايين ماڵئاوايى له شاژن ئێلێزابێسى دووه‌م، شاژنى كۆچكردووى شانشينى يه‌كگرتوودا كرد.