ئەمڕۆ سەرۆکی ئەرکانی سوپای عێراق بە سەرۆکایەتیی شاندێکی سەربازی گەیشتە کەرکووک.
ئەمڕۆ پێنجشەممە 15ی 9ی 2022، فەریقی یەک عەبدولئەمیر یارەڵا، سەرۆکی ئەرکانی سوپای عێراق بە سەرۆکایەتیی شاندێکی سەربازی گەیشتە کەرکووک و لە فڕۆکەخانەی کەرکووک بەرپرسانی هێزە ئەمنییەکانی کەرکووک و پارێزگاری سەپێندراوی کەرکووک پێشوازییان لێ کرد.
هێشتا ئامانجی سەرەکیی هاتنی ئەو شاندە سەربازییە بۆ کەرکووک بەوردی نەزانراوە، بەڵام ئەوە زانراوە کە ماوەیەکە جموجۆڵی داعش لە سنووری پارێزگای کەرکووک زیادی کردووە و هاتنی ئەو شاندە باڵا سەربازییەی عێراقیش پێ دەچێت بۆ تاوتوێکردنی دۆخی ئەمنیی پارێزگای کەرکووک و هۆکارەکانی زۆریی جموجۆڵی داعش بێت.