ئێواره‌ى ئه‌مڕۆ چوارشه‌م نێچيرڤان بارزانى سه‌رۆكى هه‌رێمى كوردستان له په‌يوه‌ندييه‌كى ته‌له‌فۆنيدا له‌گه‌ڵ سه‌يد عه‌مار ئه‌لحه‌كيم سه‌رۆكى ڕه‌وتى حيكمه بۆ كۆچى دواييى خوالێخۆشبوو سه‌يد حه‌سه‌ن ئه‌لسه‌درى خاڵى، سه‌ره‌خۆشى لێ كرد.
نێچيرڤان بارزانى وێڕاى ده‌ربڕينى هاوخه‌مى له‌گه‌ڵ سه‌يد ئه‌لحه‌كيم و خانه‌واده‌ى به‌ڕێزى ئه‌لسه‌در، هيواى خواست خواى مه‌زن خوالێخۆشبوو به به‌زه‌يى و ميهره‌بانيى خۆى شاد بكات و سه‌بوورى و ئارامى به هه‌مووان ببه‌خشێت.
لاى خۆيه‌وه سه‌يد عه‌مار ئه‌لحه‌كيم سوپاس و پێزانينى خۆيان و خانه‌واده‌ى ئه‌لسه‌درى بۆ په‌يوه‌ندى و هاوبه‌شيى سه‌رۆك نێچيرڤان بارزانى له خه‌م و پرسه‌كه‌ياندا ده‌ربڕى و هيواى سه‌ركه‌وتنى بۆ خواست.