قائیمقامی هه‌ولێر ئه‌مڕۆ سێشه‌م ئاشكرای كرد كه له‌مه‌ودوا له شاری هه‌ولێر غازی ماڵان لە ڕێگای پسوولەی خۆراك دابەش دەکرێت.
نه‌به‌ز عه‌بدولحه‌مید قائیمقامی هه‌ولێر ڕایگه‌یاند: بۆ زیاتر ڕێکخستنی دابەشکردنی غازی ماڵان لە شاری هەولێر، بڕیاردرا کەوا لە ڕێگای پسوولوی خۆراكەوە بەسەر هاووڵاتییان دابەش بکرێت و هەر هاووڵاتییەك کە داوای غاز دەکات لە بریکارەکە دەبی پسوولەی خۆراکی ئامادەبێ و لەلایەن بریکارەکە پسوولەکە مۆر دەکرێ.
ڕاشیگه‌یاند: مەبەست لەو هەنگاوە وەك ئاماژەمان پێدا بۆ ڕێکخستنی زیاتری پڕۆسەی دابەشکردنی غازە بەشێوەیەکی یەکسان بەسەر هاووڵاتییاندا بەنرخی فەڕمی (8500) دینار.
قائیمقامی هه‌ولێر ئاماژه‌ی به‌وه‌ش دا كه هەر بریکارێك سەرپێچی بکات و بەشە غازی هاووڵاتییان لە بازاڕی ڕەش بفرۆشێتەوە بە تووندی سزا دەدرێت.
جه‌ختیشی كرده‌وه كه هەموو بریکارەکان لەلایەن لێژنەکانی قایمقامییەتی ناوەندی هەولێر و بەڕێوەبەرایەتی نەوت و کانزاکانەوە چاودێری ورد دەکرێن.