پۆلیسی گه‌رمیان ئاشكرای كرد، ئه‌و گه‌نجه‌ی سه‌رله‌به‌یانی ئه‌مڕۆ هه‌ینی له ته‌قینه‌وه‌كه‌ی شارۆچكه‌ی كفری بریندار ببوو، كه‌مێك پێش ئێستا گیانی له‌ده‌ست دا.
موقه‌ده‌م عه‌لی جه‌مال قدووری گوته‌بێژی پۆلیسی گه‌ڕمیان ڕایگه‌یاند: دوای ئەوەی سه‌رله‌بەیانی ئەمڕۆهەینی لە شارۆچكه‌ی کفری بەهۆی تەقینەوەی مینەوە کوڕ و باوکێک برینداربوون، به‌داخه‌وه كه‌مێك پێش ئێستا كوڕه‌كه گیانی له‌ده‌ست دا.
ڕاشیگه‌یاند: كوڕه‌كه ناوی (عه‌لی تارق حوسێن) و له‌دایكبووی 2006ه.
باوكیشی ته‌ندروستی باش نییه و به‌هۆی سه‌ختی برینه‌كه‌یه‌وه ڕه‌وانه‌ی نه‌خۆشخانه‌ی سلێمانی كراوه.
سه‌رله‌به‌یانی ئه‌مڕۆ هه‌ینی له كارگه‌یه‌كی ئاسن له شارۆچكه‌ی كفری له‌نێو پاشماوه‌كان و له‌كاتی كۆكردنه‌وه‌ی ئاسندا، مینێك ته‌قییه‌وه.
له ئه‌نجامی ته‌قینه‌وه‌ی مینه‌كه، دوو كرێكاری كارگه ئاسنه‌كه كه كاریان كۆكردنه‌وه و هه‌ڵگرتنی ئاسنه‌كان بوو، بریندار بوون و ڕه‌وانه‌ی نه‌خۆشخانه‌ی كفری كران.