وه‌زاره‌تی ئاوه‌دانكردنه‌وه و نیشته‌جێكردنی حكومه‌تی هه‌رێمی كوردستان له راگه‌یه‌ندراوێكدا ئاشكرایكرد، تونێلی ئێستای ده‌ربه‌ندیخان نۆژه‌نده‌كرێته‌وه و دوو تونێلی نوێش له ده‌ربه‌ندیخان دروستده‌كرێن.
له راگه‌یه‌ندراوێكدا له‌باره‌ی خۆپیشاندانه‌كانی دوێنێی به‌رده‌م تونێلی ده‌ربه‌ندیخان، وه‌زاره‌تی ئاوه‌دانكردنه‌وه و نیشته‌جێكردنی حكومه‌تی هه‌رێمی كوردستان رایگه‌یاند، ھەفتەی داھاتوو بە بەشداری نوێنەری ئەنجومەنی وەزیران و وەزارەتی پلاندانان گفتوگۆکردن لەگەڵ کۆمپانیایەکی پسپۆڕ دەستپێدەکات بۆ دروستکردنی دوو تونێلی نوێ له دەربەندیخان.
له راگه‌یه‌ندراوه‌كه‌دا هاتووه، لەسەر داوای وەزیری ئاوەدانکردنەوە و نیشتەجێکردن رەزامەندی درا له‌سه‌ر تەرخانکردنی بڕی 187 ملیۆن و828 هەزار دینار بۆ پڕۆژەی چاککردن و نۆژەنکردنەوەی تونێلی دەربەندیخان، بە مەبەستی چاککردنەوەی تونێلەکە و کارئاسانیکردن بۆ هاتووچۆی هاووڵاتییان.
دوێنێ شه‌ممه 20 ـی ئابی 2022، ژماره‌یه‌ك هاووڵاتیی دانیشتووی ده‌ربه‌ندیخان له‌به‌رده‌م تونێلی شاره‌كه خۆپیشاندانیان كرد و داویانده‌كرد، حكومه‌تی هه‌رێمی كوردستان تونێله‌كه نۆژه‌ن بكاته‌وه، چونكه مانگانه ده‌یان كه‌س به‌هۆی خراپی رێگاكه‌وه تووشی روودای هاتووچۆ ده‌بن و گیان له‌ده‌ستده‌ده‌ن.