مەسرور بارزانی: جینۆسایدكردنی خۆشك و برایانی ئێزیدی ئەوەندە ناخ هەژێن بوو لەبیر ناكرێت 

مەسرور بارزانی،سەرۆكی حكومەتی هەرێمی كوردستان بە بۆنەی هەشتەمین ساڵیادی خۆشك و برایانی ئێزیدی رایگەیاند: ئەڤ تاوانە هندا ب دلئێش و ناخ هژێن بوو كۆ چ جاران ناهێتە ژ بیركرن.
دەقی پەیامەكەی سەرۆكی حكومەت .
ل هەشتەمین ساڵڤەگەڕا جینۆسایدكرنا خوشك و برایێن ئێزیدی ل شنگالێ و دەردوورێن وێ لسەر دەستێ تیرۆریستێن دڕندە یێن داعش، ب خەم و كۆڤانڤە، بیرەوەرییا شەهیدان و بێ سەر و شوونێن وێ تاوانا هۆڤانە دكەینەڤە كۆ تێدا هزاران كەس ب كۆم شەهید كرن و بێ سەر و شوون و دەربدەر كرن. 
ئەڤ تاوانە هندا ب دلئێش و ناخ هژێن بوو كۆ چ جاران ناهێتە ژ بیركرن و ویژدانا گەلێ كوردستانێ و مرۆڤایەتیێ هەژاند و پێدڤییە ب هیچ رەنگەكی رێك نەهێتەدان ئەڤ كۆمكوژی و تاوانە، دووبارە ببنەڤە. 
دڤێ بیرەوەریێدا، پێدڤییە قوربانیدانێن هێزا پێشمەرگەیێ كوردستانێ ل رزگاركرنا شنگالێ ب ڕێبەری و سەرپەرشتییا ئێكسەر یا جەنابێ سەرۆك مەسعود بارزانی ژ بیر نەكەین كۆ ب خوونا گەشا سەدان پێشمەرگەیێن قەهرەمانێن كوردستانێ، شنگال ژ دەستێ تیرۆریستێن داعشێ هاتە ئازاد كرن.
خوشك و برایێن ئێزیدی، د دیرۆكا كەڤن و نوودا و ل درێژاهییا ساڵێن دەربازبوویی، ب مخابنیڤە، گەلەك ئێش و دەردەسەری دیتینە، نها ژی ب سەدەما خۆسەپاندنا گرووپێن چەكدار، شنگال تا نها ناوچەیەكا نە تەنایە و خەلكێ وێ یێ ئاوارە نەشێن بزڤڕنەڤە. لەوڕا ب ڤێ هەلكەفتێ، داكۆكیێ لسەر بجهئینانا ڕێككەفتنا شنگالێ و ئاساییكرنەڤا رەوشا دەڤەرا شنگالێ و دەركەفتنا میلیشیا و گروویێن چەكدار یێن ژ یاسایێ دەركەفتین دكەینەڤە داكۆ دووماهی ب ئێش و ئازارێن ئاوارەیێن شنگالێ بهێت و ب سەر بلندی بزڤڕنەڤە وارگەهێن خۆ.
دڤێ بیرەوەرییا خەمگیندا، دووپات دكەینەڤە، حكومەتا هەرێما كوردستانێ، دێ یا بەردەوام بیت لسەر بزاڤێن خۆ دگەل حكومەتا فیدرال و جڤاكا نێڤ دەولەتی ژ بۆ زڤڕانەڤەیەكا سەربلندییانە یا خوشك و برا یێن ئێزدی بۆ سەر جهـووارێن وان ، پێخەمەت ئاڤەدانكرنەڤا شنگالێ و دەڤەرێن دی یێن ئێزیدییان دا كو خزمەتەكا هەژی بۆ بهێتەكرن و لگۆڕی یاسایا ڕزگاربوویێن ئێزیدی، كۆ جڤاتا نوونەرێن عێراقێ پەسەند كری، قەرەبوویا كەسوكارێن قوربانییان بهێتەكرن. د هەمان دەمدا حكومەتا هەرێما كوردستانێ، لگەل تیما ڤەكۆلینا نێڤدەولەتی یا تاوانێن داعشێ (یونیتاد) د هاریكاری و هەماهەنگییەكا بەردەوام دایە ژ بۆ دادگاییكرنا تاوانبارێن داعشێ و ئەرشیڤكرنا تاوانێن وان و پتر ب دونیایێ ناساندنا جێنۆسایدا خوشك و برایێن ئێزیدی.
هزاران سڵاڤ  ل گیانێ پاقژێ شەهیدێن جینۆسایدا شنگالێ و تەڤایا شەهیدێن كوردستانێ. 

مەسرور بارزانی
سەرۆكێ حكومەتا هەرێما كوردستان
3ێ تەباخا 2022