بە ئامادەبوونی سەرۆک بارزانی، رووفاتی ئەنفالکراوی بارزانییەکان بە خاکدەسپێردرێن

کەمێک پێش ئێستا بە ئامادەبوونی سەرۆک مەسعود بارزانی رێوڕەسمی بە خاکسپاردنی رووفاتی 100 ئەنفالکراوی بارزانی لە مۆنۆمێنتی بارزانییە جینۆسایدکراوەکان لە بارزان دەستیپێکرد.

لە رێوڕەسمەکەدا نێچیرڤان بارزانی سەرۆکی هەرێمی کوردستان و ژمارەیەک لە سەرکردە و نوێنەری لایەنە سیاسییەکانی کوردستان و عێراق بەشدارن.

بەڕێوەبەرایەتی کاروباری شەهیدان و ئەنفالکراوانی بارزان بڵاویکردووەتەوە، گۆڕی بەکۆمەڵی 100 لە ئەنفالکراوە بارزانییەکان لە بیابانی عەرعەر-ی سەر بە پارێزگای موسەنا دۆزراوەنەتەوە و پرۆسەکە 14 رۆژی خایاندووە، روفاتەکانیش بەشێوەیەکی زانستی گواستراونەتەوە بەغدا بۆ ئەوەی رێکارە پزیشکی و یاساییەکان تەواوبکرێن، لە بەدواداچوونەکانیش دەرکەوتووە گۆڕی 100 ئەنفالکراوی بارزانییەکانە و، لەلایەن رژێمی بەعس گولـلەباران کراون و بە شۆفڵ خۆڵ بەسەر تەرمەکانیاندا کراون.

جینۆسایدی بارزانییەکان لەلایەن رژێمی بەعس، لە 31ی تەممووزی 1983 بە چەند قۆناغێک دەستیپێکرد و زیاتر لە هەشت هەزار پیاو و گەنجی بارزانییەکان جینۆساید کران، رژێمی بەعس ئامادەنەبوو هیچ زانیارییەک لەبارەیانەوە دەربخات، دوای رووخانی رژێمی بەعس لە ساڵی 2003، دەرکەوت بارزانییەکان بە فەرمانی سەدام حوسێن ئەنفالکراون و لە بیابانەکانی باشووری عێراق لە گۆڕی بە کۆمەڵدا نێژراون.

پێشتر ژمارەیەک رووفاتی دیکەی ئەنفالکراوی بارزانییەکان لە گۆڕە بە کۆمەڵەکانی باشووری عێراق دۆزراونەتەوە و گەڕێندراونەتەوە هەرێمی کوردستان. لە ساڵی 2004دا، 513 روفاتی ئەنفالکراوانی بارزانییەکان لە گۆڕێکی بەکۆمەڵ لە بیابانەکانی پارێزگای موسەنا دۆزرانەوە و لە ساڵی 2005 لە رێوڕەسمێکدا بە سەرپەرشتی و ئامادەبوونی سەرۆک مەسعود بارزانی گەڕێندرانەوە کوردستان و، لە گۆڕستانی تایبەت بە ئەنفالکراوان لە دەڤەری بارزان بەخاکسپێردران.

لە درێژەی پرۆسەکەدا و بۆ جاری دووەم، لە ساڵی 2011 لە گۆڕێکی بە کۆمەڵی بیابانەکانی باشووری عێراق روفاتی 93 پیاو و گەنجی بارزانییە جینۆسایدکراوەکان دۆزرانەوە.