په‌رله‌مانی كوردستان ئه‌مڕۆ دووشه‌م له به‌یاننامه‌یه‌كدا به توندی سه‌ركۆنه‌ی هێرشه مووشه‌كییه‌كه‌ی ئه‌مشه‌وی كێڵگه‌ی گازی كۆرمۆری كرد و داوای له حكوومه‌تی عێراق كرد بۆ دووباره‌نه‌بوونه‌وه‌ی ئه‌م هێرشانه له‌گه‌ڵ حكوومه‌تی هه‌رێم بۆشایی ئه‌منی ناوچه‌كان پڕ بكه‌نه‌وه و ئه‌نجامده‌رانی هێرشه‌كه‌ش ده‌ستگیر بكه‌ن.
په‌رله‌مانی كوردستان له به‌یاننامه‌كه‌دا ڕایگه‌یاند: بەداخەوە جارێکی دیکە گرووپە لە یاسا دەرچووە گێرەشێوێنەکان هێرشیان کردەوە سەر کێڵگەی کۆرمۆر، ئەوەش درێژکراوەی زنجیرەیەک هێرشی ترسنۆکانەیە بۆ سەر ژێرخانی وزەی هەرێمی کوردستان کە بەپێی یاسا بەرکارەکان و دەستووری عێراقی بۆ بەرژەوەندی خەڵک فەراهەم کراوە.
هه‌روه‌ها ڕایگه‌یاند: وێڕای بە توندی سەرکۆنەکردنی ئەو هێرشانە، بەناوی پەرلەمانی کوردستانەوە داوا لە حکوومەتی عێراق دەکەین پابەندییان بە هەماهەنگییەکانیان لەگەل حکوومەتی ھەرێمی کوردستان زیاتر بکەن و ئەو بۆشاییە ئەمنییەی کە لەو ناوچانە دروستبووە، پڕ بکەنەوە.
ڕاشیگه‌یاند: هاوکات ئەرکی حکوومەتی عێراقیشە بەپەلە ئەنجامدەرانی هێرشەکە دەستگیر بکەن و رووبەڕووی یاسایان بکەنەوە و هەموو رێکارێک بگیرێتەبەر بۆ رێگریکردن لەو گرووپە لە یاسا دەرچووانە لە دووبارەکردنەوەی ئەو جۆرە هێرشانە.
ئاماژه‌ی به‌وه‌ش دا: دامەزراوەکانی وزەی هەرێمی کوردستان بەپێی یاساکانی کوردستان و لەچوارچێوەی دەستووری عێراق بنیاتنراون و موڵکی خەڵکی هەموو عێراقن و ماف و دەسکەوتی خەڵکی کوردستانن، بۆیە پێویستە پارێزگاری تەواویان لێ بکرێت.
جه‌ختیشی كرده‌وه كه لێژنەکانی ناوچە کوردستانییەکان و وزە و سامانە سروشتییەکان و ناوخۆ و پێشمەرگە رادەسپێرین تا لەگەل لایەنە پەیوەندیدارەکانی حکوومەتی ھەرێمی کوردستان بەدواداچوونی ورد بکەن لە هۆکاری دووبارەبوونەوەی ئەو جۆرە هێرشانە و چۆنیەتی زامنکردنی زیاتری ئاسایشی دامەزراوەکانی ژێرخانی ئابووری ھەرێمی کوردستان.