بە گوژمەی نزیكەی یەك ملیار دینار ژمارەیەك پرۆژە لە دەوروبەری هەولێر جێبەجێ دەكرێن
بە گوژمەی نزیكەی یەك ملیار دینار، ژمارەیەك پرۆژەی قیڕتاوكردن لە شارۆچكەكانی بەحركە و عەنكاوە و گوندی كەلەكان جێبەجێ دەكرێن.
ئه‌مڕۆ چوارشه‌ممه 20/7/2022، وه‌زاره‌تی شاره‌وانی و گه‌شتوگوزار، راگه‌یاندراوێكی بڵاو كرده‌وه و تێیدا هاتووه، بە مەبەستی پەرەپێدانی پرۆژە خزمەتگوزارییەكانی سنووری دەوروبەری هەولێر، بە گوژمەی نزیكەی یەك ملیار دینار، ژمارەیەك پرۆژەی قیڕتاوكردن لە شارۆچكەكانی بەحركە و عەنكاوە و گوندی كەلەكان جێبەجێ دەكرێن.
پرۆژەكان لەلایەن تیمی شارەوانییەكانی سەر بە بەڕێوەبەرایەتیی گشتیی شارەوانییەكانی هەولێرەوە دەست بە جێبەجێكردنیان كراوە كە ژمارەیان چوار پرۆژەن.
پرۆژەكان بریتین لە پرۆژەی دروستكردن و قیڕتاوكردنی شەقام لە گوندی كەلەكان و قیڕتاوكردنی شەقام لە گەڕەكی ژین لە بەحركە و گۆڕستانی كۆمەڵگەی بەحركە، هەروەها قیڕتاوكردنی شەقامە جیاكراوەكانی 189ی شارۆچكەی عەنكاوە.
جگە لەم پرۆژانەش، ئێستا لە سنووری بەڕێوەبەرایەتیی گشتیی شارەوانییەكانی هەولێر چەندین پرۆژەی تری هەمەجۆری خزمەتگوزاری لە قۆناغی جێبەجێكردندان.