عەلی عەونی، بەرپرسێ لقا هەشت یا پارتی: هەرێما کوردستانێ خەنجەرەکە ل پشتا داگیرکەرێن کوردستانێ کەفتی

سەجا شێرزاد – دهۆک

پ.ک.ک ە رۆژ بۆ رۆژێ تایبەت ل ڤان ساڵێن دۆیماهیێ ئەو ب بەهانەیێن دلسوزیێ و شەرێ کوردینیێ لڤینێن خۆ بەرفرەە کرینە و سنورێن هەرێما کوردستانێ دابەزینە هەتا گەھشتینە ناڤا باژار و باژاروکێن کوردستانێ تایبەت ژی ل ناوچەییا بەهدینان ل دەروروبەرێن پارێزگەها دھۆکێ، و ژبۆ پتر وەرگرتنا زانیارییان ل سەر لڤینێن وان و کارتێکرنا وان درەوشا سیاسییا هەرێما کوردستانێ دا، رۆژنامەیا “هەولێر” هەڤپەیڤینەک دگەل عەلی عەونی ئەندامێ سەرکردایەتییا پارتی دیموکراتی کوردستان و بەرپرسێ لقا هەشت ل زاخۆ ئەنجامداییە:

عەلی عەونی، دیارکر: پەکەکە ددەسپێکێ دا دکراسێ پارتەکا ناسیونالیستا رادیکال ھاتییە دمەیدانێ دا ژبۆ ئاڤاکرن و ئازادکرنا هەر چوار پارچێن کوردستانێ دگەل پارچەیا پێنجێیاکو ل ئەرمەنستانێ، ژوێرێ هەتا ئەڤرۆ رۆژ بۆ رۆژێ ئارمانجا وان هاتییە گوھورین و دنوکە دا کارێ وان بوویە کارکرن ل سەر ئازادکرنا ئوجەلانی ب تنێ، و ئەو ژی ل ژێر ھندەک دروشمان وەکو دروشمێ “خوەسەری” و “براتییا گەلان” لڤینێن خۆ دکەن لێ ئەڤان لڤین و دروشمان دراستی دا چ بنیات و راستی و بها بۆ نینە،
هەرێما کوردستانێ خەنجەرەکە ل پشتا داگیرکەرێن کوردستانێ کەفتی، ئوجەلانی ب خۆ ژی دئێک ژچاڤپێکەفتنێن خۆدا ئەڤ چەندە گوتییە، کوردستانا مە نوکە پێگەە و بنگەهەکێ سەرەکییێ گەلێ کوردە کو زمانێ کوردی تێدا زمانێ فەرمییە و راگەهاندن تێدا پێش دکەڤیت سیاسەتا خۆیا تایبەت و پەرلەمان و حکومەتا خۆ هەیە ژلەوما ژی ئەو دبینن کو ڤێرێ دبیتە خالا سەرەکی ژبۆ ئەنجامدانا کارێن وان وەکو ترسەک خەنجەرا کوردستانێ ل پشتا وان بکەڤیت.
ل چەند مەھێن بوری دا رۆژانە پەکەکێ پروسەیێن توپ بارانکرنێ ل دەڤەرێن هەرێما کوردستانێ هەبووینە تایبەت ل گوندێن دەوروبەرێن قەزا ئامێدیێ دەڤەرێن نێروە ورێکان، و هەتا نوکە ب تنێ ل سنوورێ قەزا ئامێدیێ نێزیک ٢٠٠ گوندان و ل زاخۆ نێزیک ٤٠ گوندان و ب گشتی ل پارێزگەها دھۆکێ نێزیک ٤٠٠ گوندان ب پروسەیێن خۆیێن شەروکی ژخەلکێ چوول کرینە.
ب گور خواندنا عەلی عەونی، ئەگەر خواندنەکێ بۆ وان جهان بکەینیێن پەکەکە شەری تێدا دکەن دێ بینین ئەو دەڤەرێن شەر لێ هەی چ سنوور دگەل وەلاتێ تورکیا نینن، و شەرێ پەکەکێ تایبەت ل ڤان دویماھییان ل شنگالێ ئەڤ چەندە دووپات کر، بوچی پەکەکە ل شنگالێ دھێنە کوشتن؟ ئەگەر پەکەکە هاتییە بۆ ئازادکرنا کوردستانێ بوچی ل وان جهان نیننیێن ئازاد نەبووین؟ بوچی ئەو ل گوندێن ئامێدیێ نە و دناڤ ئەردێن زێبارییانە و ڤان باژێران چ سنور دگەل تورکیا نینن؟ و ئەڤە وێ چەندێ دیاردکەت کو پەکەکە ب تنێ بۆ تێکدانێ ئەڤی شەری دکەت، دیسان ئەوان بەرنامە ل تورکیا نینە چونکە و هەتا نوکە تێکوشان و رێکخستنا پەکەکێ ل ناوچێن کورد ل تورکیا دیار نینن.
ل دویماھییا هەڤپەیڤینا خۆ عەلی عەونی دیارکر کو پەکەکە دلیستەیێن وەلاتێن رۆژئاڤایی دا دلیستا تیرورێ دانە ئەڤە ژی ئەنجامێ کریارێن وانە و ئەوروپا دبابتێن تیرورێ دا پشتگیرییا هەرێما کوردستانێ دکەت لێ بابەتێ پەکەکێ ل هەرێمێ بابەتێ کورد دگەل کوردە و ئەم ناخوازین ئەڤ شەرە وەسا بهێتە قەلەمدان کو کورد ب دژی کوردی رادبیت تایبەت بەرامبەر دەولەتێن بیانی، لێ دیسان حکومەتا عیراقێ دگەل ھندەک ئالی و لایەنێن سیاسی ژی هاریکارن دگەل پەکەکێ ل دژی پارتی دیموکراتی کوردستان و گەلەک کریارێن پارتیێ ب خیانەت و شکەستن دناسینن و شکەستنێن خۆ ب بهایێ سەرکەفتنێ نیشان ددەن.
و ل دویماھیێ خواست، حزبێن سنورێ پارێزگەها سلێمانیێ ھشیارببن و دەستا بۆ پەکەکێ نە قۆتن ئەگەر نە پەکەکە هەتا دوو ساڵێن دی دێ دناڤا سلێمانیێ دا ھاتن و چوونێ کەن و خالێن پشکنینان دێ دانن بۆ داخوازکرنا ناسنامێ ژھاولاتیێ سلێمانیێ.