پارێزگاری هه‌ولێر رایگه‌یاند، ئۆتۆمبێله‌كانی هه‌ولێر 57%ی كۆی سه‌رجه‌م ئۆتۆمبێله‌كانی هه‌رێمی كوردستان پێكده‌هێنن و ده‌بێت له‌سه‌ر ئه‌و بنه‌مایه‌ش به‌شه به‌نزین بۆ شاره‌كه دابین بكرێت.
ئه‌مڕۆ یه‌كشه‌مه 26/6/2022، پارێزگاری هه‌ولێر له كۆنگره‌یه‌كی رۆژنامه‌وانیدا رایگه‌یاند: شاری هه‌ولێر 57% كۆی ئۆتۆمبێله‌كانی هه‌رێمی كوردستان پێكده‌هێنێت و له‌مه‌وپاش ده‌بێت له‌سه‌ر ئه‌و بنه‌مایه به‌شه به‌نزینی هه‌ولێر دابین بكرێت.
گوتیشی: بۆ چاره‌سه‌ركردنی كێشه‌ی گرانی و كه‌می به‌نزین و له شاری هه‌ولێر ئه‌مڕۆ چه‌ند بڕیارێكی نوێمان داوه كه بریتییه له: ” دابه‌شكردنی به‌نزینی 690 دیناری له‌مه‌وپاش ته‌نیا بۆ ئۆتۆمبێلی تاكسی و پاس ده‌بێت، هاوكات به‌نزینی 800 دیناریش ته‌نیا بۆ ئۆتۆمبێلی تایبه‌ت ده‌بێ”.
پارێزگاری هه‌ولێر له باره‌ی كۆلێتی ئه‌وبه‌نزینه‌ی كه دابه‌ش ده‌كرێت، رایگه‌یاند، به‌رده‌وام چاودێری به‌ننزینخانه‌كان ده‌كه‌ین و هه‌ر سه‌رپێچییه‌ك تۆمار بكرێت لێپیچینه‌وه‌ی یاسایی ده‌كرێت و له‌مه‌وپاشیش هه‌ر به‌نزینخانه‌یه‌ك سزابدرێت ناو ناونیشانه‌كه‌ی بۆ ڕای گشتی بڵاو ده‌كه‌ینه‌وه.