وه‌زاره‌تی پێشمه‌رگه ئاشكرای ده‌كات، وه‌زیری پێشمه‌رگه و به‌رپرسی راوێژكارانی سه‌ربازی هاوپه‌یمانان له عێراق له‌باره‌ی دانانی پلانی سه‌ربازی بۆ رووبه‌ڕووبوونه‌وه‌ی داعش كۆبوونه‌وه.
وه‌زاره‌تی پێشمه‌رگه‌ی حكومه‌تی هه‌رێمی كوردستان راگه‌یه‌ندراوێكی بڵاوكرده‌وه، تێیدا هاتووه، ئەمڕۆ (یه‌كشه‌ممه 12ـی حوزەیران / یۆنیۆی 2022)، شۆڕش ئیسماعیل، وه‌زیری پێشمه‌رگه و ژەنەڕاڵ دۆسێج، بەرپرسی راوێژکارانی سەربازی هاوپەیمانان لە عێراق له‌باره‌ی دوایین گۆڕانکارییە سەربازی، ئیداری، پڕۆسەی چاکسازی، یەکخستنەوە و رێکخستنەوەی هێزەکانی پێشمه‌رگه كۆبوونه‌وه.
هه‌روه‌ها وه‌زاره‌تی پێشمه‌رگه راشیگه‌یاند، له میانی كۆبوونه‌وه له‌گه‌ڵ به‌رپرسی راوێژكارانی هاوپه‌یمانان جه‌خت له په‌یوه‌ندییه‌كان لەگەڵ وەزارەتی بەرگری عێراق، بە مەبەستی هەماهەنگی زیاتر و دانانی پلانی سەربازی هاوبەش لە نێوان هەردوولادا بۆ رووبەرووبوونەوەی تیرۆریستانی داعش لە ناوچەکەدا، كرایه‌وه.
ئه‌وه‌ش خرایه‌ڕوو، ستایشی رۆڵی بەرچاوی هێزەکانی هاوپەیمانان کرا، بەردەوام و دڵسۆزانە خزمەت بە هێزی پێشمەرگە و هەرێمی کوردستان دەکەن و پاڵپشتی بەردەوامی وەزارەتی پێشمەرگەن بۆ درووستبوونی هێزێکی نیشتیمانی لە ژێر چەتری وەزارەتی پێشمەرگەدا.
ژەنەڕاڵ دۆسێج ، دڵخۆشی خۆی لە بەردەوامی پرۆسەی چاکسازی، یەکخستنەوە و ڕێکخستنەوەی هێزەکان لە وەزارەتی پێشمەرگە دەربری، پشتیوانی هێزەکانی هاوپەیمانانیشی بۆ وەزارەتی پێشمەرگە دووپاتکردەوە.