كاتژمێر (09:35)ی ئه‌مشه‌و په‌لامارێكی تیرۆریستیی به درۆنی بۆمبڕێژكراو كرایه سه‌ر رێگه‌ی سه‌ره‌كی هه‌ولێر پیرمام.
دوای ئه‌و په‌لاماره تیرۆریستییه، مسته‌فا كازمی، سه‌رۆك وه‌زیرانی عێراق له په‌یوه‌ندییه‌كی ته‌له‌فۆنیدا له‌گه‌ڵ مه‌سرور بارزانی، سه‌رۆكی حكومه‌تی هه‌رێمی كوردستان، رایگه‌یاند، ئه‌و په‌لاماره، ده‌رخه‌ری سووربوونی هه‌ندێكه له‌سه‌ر ره‌گداكوتانی لۆژیكی پشێوی و گورزوه‌شاندن له چه‌مكی ده‌وڵه‌ت.
له راگه‌یه‌ندراوێكدا، نووسینگه‌ی راگه‌یاندنی سه‌رۆك وه‌زیرانی عێراق بڵاویكرده‌وه، له‌و په‌یوه‌ندییه‌دا، مسته‌فا كازمی رایگه‌یاندووه، حكومه‌تی عێراق هه‌موو جۆره تۆقاندنێكی هاووڵاتیان و ده‌ستدرێژیكردنه سه‌ر یاسا و ده‌وڵه‌ت ره‌تده‌كاته‌وه و حكومه‌تی عێراق جه‌خت له‌سه‌ر هه‌ماهه‌نگی له‌گه‌ڵ حكومه‌تی هه‌رێمی كوردستان ده‌كاته‌وه بۆ راوه‌دوونانی ئه‌و لایه‌نانه‌ی ده‌یانه‌وێت سه‌قامگیری تێكبده‌ن.
له‌و باره‌یه‌وه، مه‌سرور بارزانی، سه‌رۆكی حكومه‌تی هه‌رێمی كوردستان بۆ مسته‌فا كازمی، سه‌رۆك وه‌زیرانی عێراق جه‌ختیكردووه‌ته‌وه له‌سه‌ر بایه‌خ و گرنگی كاری هاوبه‌شی هه‌ولێر و به‌غدا له پێناو سه‌قامگیری و پته‌وتركردنی ئاسایش.
هه‌ردوولاش له‌و په‌یوه‌ندییه ته‌له‌فۆنییه‌دا جه‌ختیان له‌سه‌ر ئه‌وه كردووه‌ته‌وه، ئه‌و په‌لاماره‌ی سه‌ر هه‌ولێر ئامانج لێی زیانگه‌یاندنه به‌و هه‌ماهه‌نگییه‌ی له نێوان هه‌ولێر و به‌غدا هه‌یه و هه‌روه‌ها هه‌وڵدانه بۆ تێكه‌ڵكردنی كارته‌كان و بڵاوكردنه‌وه‌ی پشێوی.