بۆ یەکەم جار لە هەرێمی کوردستان، لە دانیشتنێکی زانستیدا، بەڕێوەبەرایەتی ناحیەی هەریر، لە ڕۆژی 29ی ئەم مانگە، بناغەی زانستی شاری تەندروستی لە هەریر لە چوارچێوەی دیدارێکی زانستی دانا و تێیدا ناوەرۆکی زانستی بە زمانی کوردی لەوبارەوە بەرهەم هات و نامیلکەیەکی بە چاپ گەیاند. ئەم دانیشتنە زانستییە جگە لەوەی دەبێتە نەخشەڕێگەیەک بۆ پێشخستنی شاری هەریر و دیاریکردنی خاڵی لاواز و بەهێز بە مەبەستی گەشەکردن بەپێی پرەنسیپەکانی شاری تەندروست، دەبێتە سەرچاوەیەکی گرینگی زانستی بۆ کاری هاوشێوە لە شارەکانی دیکە. شایانی ئاماژەیaە لەم دانیشتنەدا جگە لە وتاری بەڕێوەبەری ناحیە، پارێزگاری هەولێر و کاک عەباس غەزالی، شەش بابەتی پەیوەندیداری زانستی لە لایەن دکتۆر حوسێن کوردنەژاد، دکتۆر هەژار ڕەحیمی، کاروان کەریمخان، مامۆستا خەتاب عوسمان، دکتۆر سەدرەدین عەبدوڵا و دکتۆر سامان عەبد ڕەسوول پێشکەش کران و ئەنیمەیشنێکی شاری ڤەنکۆڤەر وەک مۆدێلێکی ئەزموونی بە ژێرنووسی کوردی لە لایەن بەڕێوەبەرایەتی ناحیەی هەریر و دیکیۆمێنتارییەکی تایبەت بە شاری تەندروست، لە هەریر لە لایەن کوردستان 24 ئامادە کرابوو. شایانی باسە دواتر کۆی توێژینەوەکان و ڕاپۆرتی سیمپۆزیۆم لە بڵاوکراوەیەکی تایبەتدا دەخرێتەڕوو. بە گشتی ئامانج لەم سیمپۆزیۆمە کۆککردن و کۆکردنەوەی ڕا و بۆچوونی زانستیانەی کارناسان بوو لە بارەی چۆنیەتی دروستکردنی شاری تەندروست بەپێی توانای سیستەم و دۆخی کۆمەڵگە. ئامانجی دواتر خۆماڵی کردن و وێکچواندنی توخمەکانی شاری تەندروست بوو لە سەر شاری هەریر بە شێوەیەکی تیۆری و ڕوانگەیەکی چەند ڕەهەندی، بەپێی پرەنسیپ و پێناسەکانی دامەزراوەی تەندرووستیی جیهانی.
بناغەی زانستی شاری تەندروست لە هەریر دانرا
