بەیانی ئەمڕۆ چوارشەممە 2022/5/25، نێچیرڤان بارزانی، سەرۆكی هەرێمی كوردستان، پێشوازی لە مارك برایسۆن باڵیۆزی بەریتانیا لە عێراق و شاندێكی سیاسی و سەربازیی یاوەری كرد.
لە كۆبوونەوەیەكدا برەودان بە پەیوەندییەكانی بەریتانیا لەگەڵ عێراق و هەرێمی كوردستان، دوایین پێشهاتەكانی پرۆسەی سیاسیی عێراق، دۆخی ناوخۆی هەرێمی كوردستان، شەڕی دژی تیرۆر و جموجۆڵەكانی داعش بەتایبەتی لە ناوچەكانی مادەی سەد و چل، گۆڕانی كەشوهەوا و كاریگەرییەكانی لەسەر عێراق و هەرێمی كوردستان و ناوچەكە، تاوتوێ كران.
هەردوولا جەختیان لە گرنگیی هەبوونی تێڕوانین و لێكگەیشتنی هاوبەشی لایەنە عێراقییە‌كان بۆ چارەسەری كردەوە و هاوڕا بوون لەوەی ئەگەر بڕیار و ئیرادەی سیاسی هەبێت، دەرفەت هەیە لایەنەكان بگەنە چارەسەرێكی كۆكەرەوە كە چەقبەستوویی و بنبەستی سیاسی تێپەڕێنێت.
هەردوولا نیگەرانییان لە دۆخی شەنگال و پێشهاتەكانی ناوچەكە دەربڕی كە بوونە هۆی دووبارە ئاوارەبوونەوەی خەڵكی ئێزدی و جەختیان لە گرنگیی پێكەوەكاركردنی حكوومەتی فیدرالی عێراق و حكوومەتی هەرێمی كوردستان بۆ گێڕانەوەی ئارامی بۆ ناوچەكە كردەوە.
سەردانی نێچیرڤان بارزانی بۆ سلێمانی و كۆبوونەوە لەگەڵ لایەنە سیاسییەكان، پەیوەندییەكانی هەولێر ـ بەغدا، پەیوەندییەكانی عێراق لەگەڵ دەوروبەر و چەند پرسێكی جێی بایەخی هاوبەش، تەوەرێكی دیكەی كۆبوونەوەكە بوو.