سەرۆکی هەرێمی کوردستان، لەیادی 34 ساڵەی ئەنفال پەیامێکی بڵاوکردەوە و رایگەیاند: حكومه‌تى فيدراڵى عێراق له‌به‌رده‌م ئه‌ركێكى ياسايى و ئه‌خلاقى و مرۆييدايه بۆ ئه‌وه‌ى قه‌ره‌بووى لێقه‌وماوان و كه‌سوكارى ئه‌نفالكراوان بكاته‌وه تا هه‌ندێك له برينه‌كانيان ساڕێژ ببن.
لە پەیامەکەی نێچیرڤان بارزانی هاتووە: “ئه‌مڕۆ 14ى نيسان به‌وپه‌ڕى رێز و شكۆوه يادى (182) هه‌زار هاووڵاتيى بێتاوانى كوردستان ده‌كه‌ينه‌وه و سه‌رى رێز و نه‌وازش له‌به‌رده‌م گيانى پاكى شه‌هيداندا داده‌نوێنين كه ساڵى 1988 له يه‌كێك له دڕندانه‌ترين تاوانه‌كانى مێژوودا، ده‌سه‌ڵاتى ئه‌وساى عێراق جينۆسايدى كردن و گيانيان سپارد. ئه‌نفال كه به هه‌شت قۆناغ ژماره‌يه‌كى زۆرى ناوچه‌كانى هه‌رێمى كوردستانى گرته‌وه، تا هه‌تايه په‌ڵه‌يه‌كى ره‌شه به نێوچه‌وانى مێژوو و ئه‌نجامده‌رانييه‌وه و به‌رپرسياريه‌تيى ته‌واوى مرۆڤايه‌تييه كه هه‌رگيز رێگه نه‌دات ئه‌م تاوانانه له هيچ شوێنێكى سه‌رزه‌مين دووباره ببنه‌وه و به هه‌موو شێوه‌يه‌ك رێى لێ بگيرێت”.
سەرۆکی هەرێمی کوردستان لە بەشێکی دیکەی پەیامەکەدا ئاماژەی بەوەداوە: “له كاتێكدا هه‌رێمى كوردستان به دۆخێكى هه‌ستياردا تێده‌په‌ڕێت، باشترين ياد و به‌رز راگرتنى يادى شه‌هيدانى ئه‌نفال و ته‌واوى شه‌هيدانى كوردستان، ته‌بايى و پێكه‌وه‌يى و يه‌كڕيزيى هێز و لايه‌نه كوردستانييه‌كان و پێكهاته‌كانيه‌تى له‌پێناو مسۆگه‌ركردن و پاراستنى مافه ده‌ستوورييه‌كان و قه‌واره‌ى سياسى و فيدراڵى و داهاتووى هه‌رێمى كوردستاندا. له كاتێكدا دادگای باڵای تاوانه‌كانی عێراق ئه‌نفالى به جینۆساید و تاوانى دژى مرۆڤایه‌تى و تاوانى جه‌نگ ناساندووه، له‌م ياده‌دا داواكارين و دووپاتى ده‌كه‌ينه‌وه كه حكومه‌تى فيدراڵى عێراق له‌به‌رده‌م ئه‌ركێكى ياسايى و ئه‌خلاقى و مرۆييدايه بۆ ئه‌وه‌ى قه‌ره‌بووى لێقه‌وماوان و كه‌سوكارى ئه‌نفالكراوان بكاته‌وه تا هه‌ندێك له برينه‌كانيان ساڕێژ ببن”.
نێچیرڤان بارزانی، دەڵێ: “لە هه‌رێمى كوردستانيش هه‌رچى له توانادايه ده‌بێ خزمه‌تى باشترى خانه‌واده و كه‌سوكارى ئه‌نفالكراوان بكرێت و هه‌وڵه‌كان بۆ ئاوه‌دانكردنه‌وه‌ى ناوچه ئه‌نفالكراوه‌كان و گێڕانه‌وه‌ى روفاتى شه‌هيدان به‌رده‌وام بن. هه‌روه‌ها له‌سه‌ر ئاستى نێوده‌وڵه‌تيش له هه‌وڵه‌كانمان به‌رده‌وام ده‌بين بۆ ناساندنى ئه‌نفال وه‌ك جينۆسايد”.