حکوومەتی هەرێم زیاتر لە چوار ملیار دینارى بۆ وەرزی چاندنی گەنم تەرخانکرد 

وەزیرى کشتوکاڵى هەرێم رایگەیاند، حکوومەتی هەرێم رەزامەندى نیشانداوە لەسەر خەرجکردنی زیاتر لە چوار ملیار دینار بۆ وەرزی چاندنی گەنم وپاڵپشتی لە بەروبومی ناوخۆیی.   

وەزیری کشتوکاڵ (1-3-2022) لەراگەیەنراوێکدا ئاماژەى بەوەکردووە، کە سەرۆکی ئەنجومەنی وەزیران رەزامەندیدا لەسەر جێبەجێکردنی ناوەرۆکی نوسراومان ژمارە 8988 لە 2021/12/19 بە خەرجکردنی بڕی 4,201,000,000 چوار ملیار و دووسەد و یەک ملیۆن دینار.  

ئاماژەى بەوەشکردووە، ئەو پارەیە بەمەبەستی هاندان و گرنگیدانی زیاترە بە پەرەپێدانی سێکتەری کشتوکاڵی و پاراستنی ڕووەک بۆ وەرزی چاندنی گەنم بۆ ساڵی(2021_ 2022) بەرەنگاربوونەوەی چوار جۆر لە نەخۆشیەکانی (کورک، مێرووی سەن و کیسەڵ، گژوگیای پەلک پان، گژوگیای پەلک باریک) پاڵپشتی لە بەروبوومی ناوخۆیی.