حکومەتی ھەرێم دەیەوێ پێگەی ھەرێم لەسەر نەخشەی وزەی جیھانی بەھێزتر بکات 

هەرێمی کوردستان خاکێکی بەپیت و دەوڵەمەندە، لە سووتەمەتی سروشتی و”Natural Gas”  تەنیا کۆمپانیا نێودەوڵەتییە بەهێزەکانی دەوێت، وەبەری بهێنێت، ئەندازیارێکی پتڕۆڵیش دەڵێت، حکوومەتی هەرێمی کوردستان ئامانجی گەورەی هەیە لە وەبەرهێنانی گازی سروشتی، ئەو کاتەش ناو و پێگەی کوردستان لەسەر نەخشەی وزەی جیهان بەهێز دەبێت و نەوەی دواڕۆژ بەرهەمەکەی دەبینن.

هه‌رێمی كوردستان خاوه‌نی نزیکەی 5,7 تریلیۆن مه‌تر سێجا گازی سروشتییه‌ و له ساڵی ‌٢٠٢١ گرێبه‌ستی له‌گه‌ڵ كۆمپانیای ڕۆسنه‌فتی ڕووسی واژوو کردوە‌ تا بۆڕیی گازی سروشتیی هه‌رێم بۆ توركیا ڕابكێشێت.

سەبارەت بەمە و چەند پرسێکی تر، محەمەد خالد شەرەفانی، ئەندازیاری پتڕۆڵ و پسپۆڕ لە بواری سووتەمەنیی سروشتی ڕایگەیاند: ”جێگای دڵخۆشییە کە هەرێمی کوردستان لە بواری گازی سروشتیدا داهاتوویەکی گەشی لە بازاڕی جیهاندا هەیە، ژمارەی ٥.٧ ژمارەیەکی ڕاستەوڕاست نییە و دەخەمڵێنرێت بە ٢ تا ٦ ترلیۆن مەتر سێجا.”

سەبارەت بەوەی کە بۆچی هەرێمی کوردستان لە هەوڵی ئەوەدایە بەرهەمی گاز زیاد بکات، گوتی: ”حکوومەت دەیەوێت سەرچاوەی داهاتی زیاد بکات و هەر وڵاتێک بۆ ئاسایشی وزە و سەقامگیریی ئابووری، نابێت تەنیا پشت بە یەک سەرچاوە ببەستێت، شارەزایانی بواری وزە دەڵین ئەگەر بەرهەمەکانی نەوت نەما کە بە پلەی یەکەم دێت وەک وزە، گازی سروشتی دەبێتە جێگرەوەی نەوت و ئەو بە پلەی یەکەم دێت، ئەمە بابەتێکی باشە کە لە هەرێمی کوردستان هەیە.”

ئەم ئەندازیارەی پتڕۆڵ و سووتەمەنیی سروشتی دەشڵێت: “ئەگەر مامەڵەیەکی ژیرانە هەبێت لەگەڵ گازی سروشتیی هەرێمی کوردستان، پێگەی هەرێم بەهێزتر دەبێت و دەکەوێتە نێو بواری وزەی جیهانەوە، پێگەی سیاسیی هەرێمی کوردستانیش جێگیر دەکات، گەر بێت و سەیری بکەین یەکێک لە هۆکارەکانی بەهێزیی کوردستان ئەوەیە کە نەوتمان بەرهەم هێناوە، بەم هۆیەوە پێگەی دیپلۆماسیی هەرێمی کوردستان لە جیهاندا بڵندە، ئەگەر هات و دەست بە بەرهەمهێنانی گاز بکەین و بۆ وڵاتانی تر ڕەوانەی بکەین، پێگەی سیاسیی کوردستان بەهێزتر دەبێت لە عێراقی فیدڕاڵدا.”

ئاماژەی بەوەش دا: ”شتێکی تر کە لە کوردستان هەمانە کێشەی تەزووی کارەبایە، حکوومەت تۆڕبینی هەیە، وێستگەی بەرهەمهێنانی کارەبامان هەیە، بەڵام کێشە ئەوەیە بەرهەم، یا ئەو پێداویستییانەی دەمانەوێ، سەرچاوەی سروشتییە تا تۆڕبینی زیاتر بەکار بهێنن، تا بتوانن کارەبا زیاتر بەرهەم بهێنین بۆ ناوخۆی کوردستان، یەکێک لەمانە گازی سروشتیە، ئەمە هەبێت، کارەبا زیاتر بەرهەم دێت و کێشەی کەمیی کارەبا نامێنێت.”

محەمەد شەرەفانی گوتیشی: “گازی سروشتی کارتێکی گرنگە لە هەرێمی کوردستان و بەردەوام لە زیادبووندایە، هەتا حکوومەتی هەرێم گوتوویە هاوکاریی هەر کۆمپانیایەک دەکەین لە هەر شوێنێک بێت و بتوانێت وەبەرهێنان لە گازی سروشتیدا بکات، لە هەر ناوچەیەک بێت هەلی کار زۆر دەبێت، چ کۆمپانیایەکی وەک ڕۆسنەفت بێت، چ کۆمپانیای خزمەتگوزاری بێت، ئەمە هەلی کار زیاد دەکات.”

ئەم ئەندازیارەی پتڕۆڵ و سووتەمەنیی سروشتی جەختیشی کردەوە: ”ئەگەر بە شێوە ئەرێنییەکەی بیخوێنینەوە، ئامانجی حکوومەتی هەرێمی کوردستان لە بەرهەمهێنانی گازی سروشتی، زیادکردنی داهات و زیادکردنی بەرهەمی کارەبایە و کارتێکی بەهێزیشە بۆ هەرێم و پشتیوانییەکی زیاترمان دەبێت بۆ پێگەیەکی بەهێزتر لەسەر نەخشەی وزەی جیهانی و پەیوەندییە دیپلۆماسییەکانیش زیاتر دەکات، لەگەڵ ئەمانەش هەلی کار بۆ خەڵکی ناوچەکە دەڕەخسێنێت.”

بڕیاره‌ له‌ توركیا بۆڕی گازی سروشتیی كوردستان له‌ڕێی پڕۆژه‌ی ”تاناپ”ـەوە ببه‌سترێته‌وه‌ به‌ بۆڕیی گازی ئازه‌ربایجان-جۆرجیا بۆ توركیا و بولگاریا و له‌وێوه‌ بگه‌یه‌نرێت به‌ ئه‌ورووپا، ئەمەش بۆ هەرێمی کوردستان و نەوەی دواڕۆژ کارتێکی بەهێز و ژێرخانێکی ئابووریی زۆر باشە.