سه‌رچاوه‌یه‌ك له فڕۆكه‌خانه‌ی نێوده‌وڵه‌تی هه‌ولێر ئاشكرای كرد، دوای نیوه‌ڕۆی ئه‌مڕۆ یه‌كشه‌م 42 كۆچبه‌ر به فڕۆكه‌یه‌كی تایبه‌ت له لیتوانیا گه‌ڕانه‌وه هه‌رێمی كوردستان.
مقه‌ده‌م فه‌رزنده ئه‌فه‌ندی به‌رپرسی بنكه‌ی پاسپۆرت و نشینگه‌ی فڕۆكه‌خانه‌ی نێوده‌وڵه‌تی هه‌ولێر ڕایگه‌یاند: ئه‌مڕۆ كاتژمێر 3ی دوای نیوه‌ڕۆ فڕۆكه‌یه‌كی تایبه‌ت له لیتوانیاوه گه‌یشته فڕۆكه‌خانه‌ی نێوده‌وڵه‌تی هه‌ولێر كه ژماره‌یه‌ك كۆچبه‌ری هه‌ڵگرتبوو.
ڕاشیگه‌یاند: ژماره‌ی ئه‌و كۆچبه‌رانه‌ی كه له‌نێو فڕۆكه‌كه‌دا بوون بریتی بوون له 42 كه‌س كه خه‌ڵكی شاره‌كانی هه‌ولێر و سلێمانی و دهۆك بوون.
هه‌روه‌ها ڕایگه‌یاند: كۆچبه‌ره‌كان پێشتر هه‌وڵیاندابوو له سنووره‌كانی بیلاڕووسیا و پۆڵه‌ندا ڕوو له ئه‌وروپا بكه‌ن، به‌ڵام له هه‌وڵه‌كانیان شكستیان خواردبوو و ناچار ببوون داوا له لیتوانیا بكه‌ن هه‌وڵی گه‌ڕانه‌وه‌یان بده‌ن.
مقه‌ده‌م فه‌رزنده ئه‌فه‌ندی به‌رپرسی بنكه‌ی پاسپۆرت و نشینگه‌ی فڕۆكه‌خانه‌ی نێوده‌وڵه‌تی هه‌ولێر جه‌ختیشی كرده‌وه كه سه‌رجه‌م كۆچبه‌ره گه‌ڕاوه‌كان به فڕۆكه‌ی تایبه‌تی لیتوانی و له‌سه‌ر ئه‌ركی حكوومه‌تی ئه‌و وڵاته گه‌ڕێنراونه‌ته‌وه هه‌رێمی كوردستان.