ئەمڕۆ سێشەممە 9ی نۆڤێمبەری 2021 مەسرور بارزانی سەرۆکی حکومەتی هەرێمی کوردستان، پێشوازی لە جەنەرال ریچارد بێل جێگری فەرماندەی گشتیی هێزەکانی هاوپەیمانان لە عێراق و سووریا کرد کە بە بۆنەی کۆتاییهاتنی ئەرکەکانی، سەردانی کردبوو.
سەرۆکی حکومەت، سوپاسی جێگری فەرماندەی گشتیی هێزەکانی هاوپەیمانانی کرد بۆ کار و خزمەتەکانی لە ماوەی ڕابردوودا و هیوای سەرکەوتنی بۆ خواست لە ئەرکی تازەیدا.
جێگری فەرماندەی گشتیی هێزەکانی هاوپەیمانان، بە پێزانینەوە باسی لە هاوکاری و هەماهەنگیی دەزگا پەیوەندیدارەکانی هەرێمی کوردستان کرد و ئاماژەشی بەوەدا، کە ئەو هەمیشە خۆی بە دۆستێکی دڵسۆزی گەلی کوردستان دەزانێت لە هەر شوێنێک و ئەرکێکدا بێت.
بەرەنگاربوونەوەی هەڕەشە و مەترسییەکانی تیرۆریستانی داعش، بەتایبەتی لە ناوچە کوردستانییەکانی دەرەوەی ئیدارەی هەرێم و گرنگیی بەردەوامبوونی هاوکاریکردنی پێشمەرگە، تەوەرێکی دیکەی گفتوگۆکان بوو