لايه‌نه په‌يوه‌نداره‌كانى ڕا‌سپارد بۆ هاوكاريكردن و يارمه‌تيدانى لێقه‌ومان
نێچيرڤان بارزانى، سه‌رۆكى هه‌رێمى كوردستان له په‌يوه‌ندييه‌كى ته‌له‌فۆنيدا له‌گه‌ڵ ئومێد خۆشناو پارێزگارى هه‌ولێر، به‌دواداچوونى بۆ زيانه‌كانى لافاو له هه‌ولێر و چه‌ند ناوچه‌يه‌كى سنوورى پارێزگاكه كرد.
سه‌رۆكی هەرێمی کوردستان، نێچيرڤان بارزانى، دۆخ و هه‌واڵى لێقه‌وماوان و زيانمه‌ندانى له پارێزگارى هه‌ولێر پرسى و گوێبيستى ڕێكاره‌كان و پرۆسه‌ى به‌هاناوه‌چوون و چۆنيه‌تيى مامه‌ڵه‌كردنى لايه‌نه په‌يوه‌نداره حكوومييه‌كان له‌گه‌ڵ دۆخه‌كه و لێقه‌وماواندا بوو.
سه‌رۆكى هه‌رێمى كوردستان دووپاتى كرده‌وه كه سه‌رۆكايه‌تيى هه‌رێمى كوردستان له نزيكه‌وه به‌دواداچوونى مه‌يدانى بۆ شوێنه زيانبه‌ركه‌وتووه‌كانى لافاو ده‌كات و لايه‌نه په‌يوه‌نداره‌كانى ڕا‌سپاردووه بۆ هاوكاريكردن و يارمه‌تيدانى لێقه‌ومان و دابينكردنى پێداويستييه‌كانيان، هه‌روه‌ها ڕايگه‌ياند خۆشبه‌ختانه هيچ زيانێكى گيانى له لافاوه‌كان نه‌كه‌وتووه‌ته‌وه.
لاى خۆيه‌وه، ئومێد خۆشناو پارێزگارى هه‌ولێر، وێڕاى پێشكه‌شكردنى پوخته‌يه‌ك له‌سه‌ر شوێن و قه‌باره‌ى زيانه‌كان و دۆخه‌كه به‌گشتى، سوپاسى سه‌رۆكى هه‌رێمى كوردستانى كرد بۆ پرسين و به‌دواچوونى دۆخى لێقه‌ومان و زيانمه‌ندان و ئاماده‌يييان بۆ يارمه‌تيدان و هاوكاريكردنيان.