گەورەترین پڕۆژەی بەرھەمی ئاژەڵ لە دھۆك جێبەجێ دەكرێت

سەرۆكی دەستەی وەبەرھێنان لە ھەرێمی كوردستان گوتی، پڕۆژەیەكی بەرھەمی ئاژەڵ لە دھۆك جێبەجێ دەكرێت، كە گەورەترین پڕۆژەیە لەسەر ئاستی ھەموو عێراق و ئێستا لە قۆناغی جێبەجێكردندایە، كە لە قۆناغی یەكەمدا بە گوژمەی ٤٠ملیۆن دۆلار دروست دەكرێت.

دكتۆر محەمەد شوكری، بۆ ماڵپەڕی فەرمیی پارتی دیموكراتی كوردستان رایگەیاند: “پڕۆژەیەكی بەرھەمی ئاژەڵ لە ھەڵَەبجە تەواو بووە و ئێستا دەستیان بە كار كردووە و ئاژەڵیان ھاوردە كردووە، كە مۆڵەتی ھاوردەی كەرستەی بەرھەمی ئاژەڵیشمان پێیان داوە و تا ئێستا ٣٠٠بزنی ھۆڵەندی ھاوردە كراون، بۆیە بڕیارە وردە وردە كارەكانیان فراوانتر بكەن، بۆ ئەوەی پێداویستیی ناوخۆ پڕ بكەنەوە”.

شوكری گوتیشی: “جگە لەوە، مۆڵەتی پڕۆژەیەكی دیكەمان داوە بۆ بەرھەمی ئاژەڵ لە دھۆك، كە كۆمپانیای كاڤین گرووپ ئەو پڕۆژەیە جێبەجێ دەكات، ئێستاش مۆڵەتمان پێ داون و كار لەسەر دروستكردنی پڕۆژەكە دەكرێت، كە لە قۆناغی یەكەمدا بە گوژمەی ٤٠ملیۆن دۆلار دروست دەكرێت و دواتر زیاتر دەبێت”.

ناوبراو باسی لەوەش كرد، ئەم پڕۆژەیە تەواو بێت، یەكەم پڕۆژە دەبێت لەسەر ئاستی عێراق، كە لەسەر رووبەری ھەزار دۆنم زەوی دروست دەكرێت.