زوزان عەلی سالح کوچەر: ئەز دێ پارێزڤانا دەستکەفتێن هەرێما کوردستانێ بم

بەربژارا ژمارە (٢٥) یا پارتی دیموکراتی کوردستان ل بازنێ (٢) (سێمێل – زاخۆ) ئاشکرا کر کو ل جڤاتا نوونەرێن عیراقێ ئەو دێ پارێزڤانا دەستکەفتێن ھەرێما کوردستانێ بیت و دێ ھەمی بزاڤان کەت دەستکەفتێن ھەرێما کوردستانێ پتر لێ بکەت.

زوزان عەلی سالح کوچەر، بەربژارا ژمارە (٢٥) یا پارتی دیموکراتی کوردستان ل بازنێ (٢) (سێمێل – زاخۆ) بۆ مالپەرێ فەرمیێ پارتی دیموکراتی کوردستان دیار کر کو ھەکە دەنگێن خەلکی د رۆژا ھەلبژارتنان دا ب دەست خوەڤە ئینان و چوو جڤاتا نوونەرێن عیراقێ دێ ل دووڤ راسپاردێن سەکردایەتیا پارتی دیموکراتی کوردستانێ پاپەندی ھەمی شیرەتێن راستەقینە بیت و دێ پارێزڤان و بەرەڤان بیت ژ ھەمی دەستکەفت و مافێن ھەرێما کوردستانێ و گۆت: “دێ ھەمی بزاڤان کەم کەرەستێن پێدڤی بۆ جۆتیاران دابین کەم و پووتەپێدانەکا زێدەتر ب ڤێ تەخا کەد خواز بھێتەدان و ل دەمێ وەرگرتنا بەرھەمێ وان ب زووترین دەم پارێ وان بھێتە مەزاختن داکو مفایی ژ بەرھەمێ خوە ببینن و ب رژدی بۆ بەرھەمێ خوە یێ داھاتی کار بکەن”.
ناڤھاتیێ ئاماژە دا وێ چەندێ کو ئەنجامدانا ڤان ھەلبژارتنان دڤێ قووناغێ دا گرنگیا خوە بۆ ھەرێما کوردستانێ و عیراقێ ھەیە، ژ بەر کو ھەرێما کوردستانێ چەندین سالێن نەخۆش و ب زەحمەت بوراندن، بەلێ پشتی ھەلبژارتن دھێنە ئەنجامدان ھەمی بزاڤ دێ ھێنەکرن جڤاتەکا رێکخستی و کاراتر و ب دەستھەلاتر بھێتە دروستکرن و گۆت: “پێدڤیە ھەمی بەربژار ب رژدی کار بکەن بۆ ھاندانا وەلاتیا بۆ سەر سندوقێن دەنگدانێ داکو پرۆسا ئەنجامدانا ھەلبژارتنان ب سەرکەڤیت و مافێن ھەرێما کوردستانێ ل عیراقا فیدڕال زێدەتر بھێنە دابینکرن”.
زوزان عەلی سالح کوچەر، ل سالا ١٩٧٩ ژدایکبوویە، کۆلیژا چاندنێ بەشێ بیستان ب دووماھی ئینایە و بوویە ھەلگرا باوەرناما بەکالۆریۆسێ، ل سالا ٢٠٠٣ وەکو مامۆستا ھاتیە دامەزراندن، نوکە بەربژارا ژمارە (٢٥) یا پارتی دیموکراتی کوردستانە ل بازنێ (٢) (سێمێل – زاخۆ).