ڕائیب جادر – هەولێر
گوتەبێژی کۆمیسیۆنی باڵای سەربەخۆی ھەڵبژاردنەکانی عێراق، دەڵێت: بەپێی دوایین سەرژمێری ژمارەی دانیشتووانانی عێراق گەیشتووەتە زیاتر لە ٤٦ ملیۆن کەس، ئەوەش وا دەکات کە ژمارەی کورسییەکانی پەرلەمان لە ٣٢٩ کورسییەوە بۆ ٤٦٠ کورسی زیاد بکرێن. دەشڵێ: یەک ملیۆن دەنگدەری نوێ لە ھەڵبژاردنی داھاتووی عێراق دەنگ دەدەن.
کۆمیسیۆنی باڵای سەربەخۆی ھەڵبژاردنەکانی عێراق، ئاشکرای دەکات، لە چوارچێوەی ئامادەکارییەکانی بۆ ھەڵبژاردنی خولی شەشەمی پەرلەمانی عێراق کە بڕیارە لە مانگی تشرینی دووەمی ئەمساڵ بکرێت، دەست بە نوێکردنەوەی تۆماری دەنگدەران کراوە، بۆ ئەو مەبەستە ھەزار و ٧٩ بنکەی تایبەتمەند لە ھەموو شار و شارۆچکەکانی عێراق دەست بە نوێکردنەوە و سڕینەوەی ناوەکان دەکەن، ھەروەھا ناوی نوێ تۆمار دەکەن.
ھەڵبژاردن پێویستە ٤٥ ڕۆژ بەر لە کۆتای ھاتنی ماوەی خولی پەرلەمانی کە چوار ساڵە ھەڵبژاردن بۆ خولی شەشەم لە مانگی تشرینی دووەمی ئەمساڵ بکرێت، بەڵام تاکوو ئێستا لەلایەن حکوومەت یان کۆمیسیۆن وادەی کردنی ھەڵبژاردن بە فەرمی لە ھەمان بەروار دیاری نەکراوە، بەگوێرەی سەرژمێری گشتی دانیشتووانان ٢٠٢٤- ٢٠٢٥ ژمارەی دانیشتووانانی عێراق گەیشتووەتە زیاتر لە ٤٦ ملیۆن کەس، کە زیادبوونی ژمارەی دانیشتووانان گرتنەبەری دوو ڕێوشوێنی نوێی پێویست کردووە، یەکەمیان بەھای شایستەی ھەر کورسییەکی پەرلەمانی بە گوێرەی ژمارەی دانیشتووانان بەرز بکرێتەوە، دووەم ژمارەی کورسییەکانی پەرلەمان لە ٣٢٩ کورسی بۆ ٤٦٠ کورسی زیاد بکرێت.
لە دوای ساڵی ٢٠٠٥ پێنج ھەڵبژاردن بۆ ھەڵبژاردنی ئەندامانی پەرلەمانی عێراق کراون، ھەروەھا سێجار ھەمواری یاسای ھەڵبژاردن کراوە، کە دواترینیان لە مانگی ئاداری ساڵی ٢٠٢٣ بووە.
جومانە غەلای، گوتەبێژی کۆمیسیۆنی باڵای سەربەخۆی ھەڵبژاردنەکانی عێراق، لە کۆنگرەیەکی ڕۆژنامەوانیدا ڕاگەیاند، پرۆسەی نوێکردنەوەی تۆماری دەنگدەران کە نوێکردنەوە و سڕینەوە و تۆمارکردنی ناوی نوێی دەنگدەران، ھەروەھا تۆمارکردنی ناوی ئاوارەکان و ھێزە ئەمنییەکانیش لە خۆ دەگرێت لە ٢٥ی ئەم مانگە دەستی پێکردووە و بۆ ماوەی مانگێک بەردەوام دەبێت، بۆ ھەڵبژاردنی ئەنجوومەنی نوێنەرانی عێراق ٢٩ ملیۆن ھاووڵاتیی مافی دەنگدانیان ھەیە، کە یەک ملیۆن دەنگدەر ئەوانەن کە بۆ یەکەمجارە دەتوانن دەنگ بدەن.
گوتەبێژی کۆمیسیۆنی باڵای سەربەخۆی ھەڵبژاردنەکانی عێراق، ئاماژەی بەوەشکرد، قۆناغی نوێکردنەوەی تۆماری دەنگدەران دەستیپێکردووە، بۆ ئەو مەبەستە لەسەرانسەری عێراقدا ھەزار و ٧٩ بنکە کراونەتەوە.
ھەروەھا جومانە غەلای، گوتەبێژی کۆمیسیۆنی باڵای سەربەخۆی ھەڵبژاردنەکانی عێراق، ئاشکراشیکرد، لەسەر ھەر دەنگدەرێک پێویستە ناو و داتاکانی لە لیستی دەنگدەراندا نوێبکاتەوە و دڵنیاببێتەوە لێی، سەبارەت بە گواستنەوەی تۆماری دەنگدەران لە پارێزگایەکەوە بۆ پارێزگایەکی دیکە، غەلای جەختیکردەوە، تەنھا ڕێگا بە گواستنەوەی تۆماری دەنگدان بۆ پارێزگای کەرکووک نادرێت.
گوتەبێژی کۆمیسیۆنی باڵای سەربەخۆی ھەڵبژاردنەکانی عێراق، ئاماژەی بەوەشکرد: ھەزار و ٧٩ بنکەی تایبەتمەند لە سەرانسەری پارێزگاکانی عێراق بۆ ڕای کردنی ڕێکارەکان کراونەتەوە، ھەروەھا ئەو بەڵگەنامانەی کە پێویستن بۆ نوێکردنەوەی حاڵەتەکان بریتین لە کارتی بایۆمەتری، کارتی نیشتمانی، یان کۆپییەکی ناسنامەی باری شارستانی و کارتی زانیاری، جگە لە فۆرمی بەشە خۆراکی مانگانە.