فه‌رمانده‌یی ئۆپه‌راسیۆنه هاوبه‌شه‌كانی عێراق ئاماری سه‌ره‌تایی چه‌كداره كوژراوه‌كانی داعش له‌ماوه‌ی ساڵی 2022ـدا راده‌گه‌یه‌نێت و ده‌ڵێت، كار له‌سه‌ر ده‌ركردنی راپۆرتێكی تایبه‌ت له‌باره‌ی ئۆپه‌راسیۆنه سه‌ربازییه‌كانیان ده‌كه‌ن.
ئه‌مڕۆ سێشه‌ممه 27ـی كانوونی یه‌كه‌می 2022، ته‌حسین خه‌فاجی، گوته‌بێژی فه‌رمانده‌یی ئۆپه‌راسیۆنه هاوبه‌شه‌كانی عێراق رایگه‌یاند، به‌گوێره‌ی ئاماره سه‌ره‌تاییه‌كان، له‌ماوه‌ی ساڵی 2022ـدا نزیكه‌ی 200 چه‌كداری داعش له‌رێگه‌ی بۆردوومانی فڕۆكه جه‌نگییه‌كانی عێراقه‌وه كوژراون.
به‌گوته‌ی ته‌حسین خه‌فاجی، ژماره‌ی ئه‌و چه‌كدارانی داعش كه له‌ماوه‌ی ساڵی 2022ـدا له‌سه‌ر ده‌ستی هێزه ئه‌منییه‌كانی عێراق كوژراون، گه‌یشتووه‌ته نزیكه‌ی 400 چه‌كدار.
گوته‌بێژی فه‌رمانده‌یی ئۆپه‌راسیۆنه هاوبه‌شه‌كانی عێراق دووپاتیده‌كاته‌وه ئه‌و ئامارانه سه‌ره‌تایین و له‌ماوه‌ی چه‌ند رۆژی داهاتوودا كار له‌سه‌ر ده‌ركردنی راپۆرتێكی ورد له‌باره‌ی ئه‌و ئۆپه‌راسیۆنه سه‌ربازییانه بڵاوده‌كه‌نه‌وه كه له‌ماوه‌ی ساڵی 2022ـدا هێزه ئه‌منییه‌كانی عێراق له‌دژی چه‌كدارانی داعش له‌نێو خاكی عێراق و ناوچه سنوورییه‌كان ئه‌نجامیداون.
ئه‌مه له كاتێكدایه، رۆژی یه‌كشه‌ممه 25ـی كانوونی یه‌كه‌می 2022، عەبدولخالق تەڵعەت، نوێنەری وەزارەتەکانی ناوخۆ و پێشمەرگەی حكومه‌تی هه‌رێمی كوردستان لە فەرماندەیی ئۆپەراسیۆنە هاوبەشەکانی عێراق راگەیاند، ئەگەر ئەو رێککەوتنەی لەنێوان سوپای عێراق و وەزارەتی پێشمەرگە بۆ بەڕێوەبردنی ناوچە کێشە لەسەرەکان جێبەجێنەکرێت، مەترسی زیادبوونی هێرشەکانی داعش لەو ناوچانەدا هەیه.
عەبدولخالق تەڵعەت، راشیگەیاند، پێویستە لەگەڵ پەسەندکردنی بودجەی عێراق، کارەکانی لیوا هاوبەشەکان و دابینکردنی بودجە و پێداویستییەکان خێراتربکرێن.
له‌مباره‌یه‌وه رۆژنامه‌ی وۆڵ ستریت جۆرناڵی ئه‌مه‌ریكی ئاماژه‌ی به‌وه كردبوو، داعش لە دۆخی خۆ بەهێزکردنەوەدایە و پلان و ستراتیژی خۆی بۆ هێرشکردنە سەر هێزە ئەمنییەکان بەتایبەتی لە کەرکووک و دیالە گۆڕیووە و ئەوەی ئێستا دەیکات، هیچ نییە جگە لە دەستپێکێک بۆ هێرشی فراوانتر و لێدانی زەبری کوشندەتر لە سوپا و هێزە ئەمنییەکانی عێراق.
سەبارەت بە ستراتیژە نوێیەکانی داعش، ئەو رۆژنامە ئەمەریکییە ئەوەی خستبووەڕوو، داعش لەهەوڵی کۆکردنەوەی هەڵاتووی زیندانەکانی سوریادایە، تا چەکیان پێبدات و رێکیان بخاته‌وه، دواتریش هەوڵی هەڵکوتانە سەر ئەو زیندانانە دەدات کە ئەندامەکانی خۆی تێدا دەستبەسەرن.
هۆشداری ئەوەشیداوه، ئەگەر سوپا و هێزە ئەمنییەکانی عێراق هەماهەنگی هەواڵگری بەهێز نەکەن و کۆنترۆڵی ئەو ناوچانە نەکەن کە بۆشایی ئەمنی تێدایە، لەداهاتوودا ژمارەی قوربانییەکانیان زیاتردەبن.
پێشتریش فەرماندەی میحوەری شەشی ھێزی پێشمەرگەى كوردستان، رایگه‌یاندبوو، له هه‌وڵه‌كانیان بۆ پێكھێنانی دوو لیوای ھاوبەش بەردەوامن، كه ئامانج لێی به‌هێزكردنی هەماھەنگییه بۆ روبەروبونەوەی داعش.
جه‌ختی له‌وه‌ش كردبوه‌وه، بۆ نه‌هێشتنی ئه‌و بۆشاییه ئه‌منیه‌ی له ناوچه كوردستانییه‌كانی ده‌ره‌وه‌ی ئیداره‌ی هه‌رێمی كوردستاندا هه‌یه، پێكهێنانی ئه‌و دوو لیوایه زه‌روره‌تێكی حه‌تمییه.