پەیکەری (بەرخودان)ـەکەی هونەرمەند زیرەک میرە، کە تایبەت بۆ شاری کۆبانێ دروستی کردووە، دەبێتە خەڵاتی فێستیڤاڵی نێودەوڵەتی (کۆبانێ) لە ئەڵمانیا.
هونەرمەند زیرەک میرە لە سەروبەندی شەڕی داعش و هێرشەکانی بۆ سەر شاری کۆبانێ بیرۆکەی دروستکردنی پەیکەرێکی لا دروست بوو کە بتوانێت گوزارشت لە ئازایەتی و بەرخودانی ژنە شەڕڤانەکانی ڕۆژئاوا بکات لە بەرامبەر هێرشەکانی داعش بۆ سەر ژیانیان، کە دواتر بیرۆکەکەی کردە ڕاستی و توانیی پەیکەرێکی ناوازە بە قەبارەیەکی گەورە دروست بکات و پێشکەشی شاری کۆبانێی بکات.
ئێستاکەش ماوەی چەند ساڵێکە بچووککراوەی پەیکەرەکە بووەتە خەڵاتی ڤیستیڤاڵی نێودەوڵەتی کۆبانێ لە وڵاتی ئەڵمانیا و بەسەر براوەکانی ڤێستیڤاڵەکە دابەش دەکرێت کە هونەرمەندانی سەرجەم نەتەوە جیاوازەکانی تێدایە و ئەمەش جێی شانازییە بۆ کورد.
ئەم هونەرمەندە پەیکەرسازە خاوەنی پێنج پێشانگای تایبەت و زیاتر لە ١٢٠ پێشانگای هاوبەشە لە ناوخۆ و دەرەوەی وڵات ئەو پەیکەرەشی لە ساڵی ٢٠١٦ وەک دیارییەک پێشکەشی شاری کۆبانێ ی ڕۆژئاوای کوردستان کرد.
جێی باسە پەیکەرەکە لە ساڵی ٢٠١٦ دروستکراوە و دروستکردنەکەشی ماوەی حەوت مانگی خایاند کە هونەرمەند زیرەک میرە بە هاوکاری ستافێکی ١٠کەسی خۆبەخش لە شاری سلێمانی دروستیکردووە و پاشان گواستراوەتەوە بۆ شاری کۆبانێ.
پەیکەری بەرخودان کە بە پەیکەری (ژنی ئازد)یش
دەناسرێت، دوا بەدوای دروستکردن و گواستنەوەی لە ١٦ـی ئازاری ساڵی ٢٠١٦دا لە شاری کۆبانێ پەردەی لەسەر لا درا کە بە ڕەنگی سپی دروست کراوە و بەرزییەکەی ٨ مەترە و کێشەکەشی نزیکەی ٤ تەنە، لە ناوەندی شاری کۆبانێ لە ڕۆژئاوای کوردستان جێگیر کراوە وەک هێمایەک بۆ خۆڕاگریی ژنان وە هەوڵ و کۆششی ئەو ژنانەی شان‌بەشانی پیاوان لە جەنگی دژ بە داعش و لە کاتی پەلامارە خوێنڕێژییەکاندا بۆ سەر شاری کۆبانێ بەشداربوون، هاوکات هێمایە بۆ ئاشتی لە ناوچەکە و جیهان و، بووەتە پەیامی خۆشەویستی و پشتگیری و یەکبوونی کورد.
ئێستاکە پەیکەری بەرخودان جگە لەوەی بووەتە لۆگۆی فەرمیی بەشێک لە دامودەزگاکانی ڕۆژئاوا، لەگەڵ ئەوەشدا بووەتە خەڵاتی ڤیستیڤاڵی نێودەوڵەتی کۆبانێ لە ئەڵمانیا و هەموو ساڵی ژمارەیەکی زۆر لەو پەیکەرە بە قەبارەیەکی بچووک دروست دەکرێت و پێشکەش بە براوەکانی ڤێستیڤاڵەکە دەکرێت.
محمد لادێ – هه‌‌ولێر