لەژێرناونیشانی (من هەم؛ Ego Sum)ـدا بۆ یەكەمین جار لە مێژووی هونەری كوردیدا چەند كارێكی هونەریی دەستەیەك خانمی هونەرمەندی كورد دەبرێتە دەرەوەی هەرێمی كوردستان و لە شاری كراكۆڤی پۆڵەندا نمایشكی هونەری بەریوەچووە.
ئەو نمایشە هونەرییە لەلایەن زیاد ڕەئووف خاوەنی گەلەری زێد ئار هاتۆتە بەرهەم و بە سەرپەرشتی كیورەیتەی دیاری پۆڵەندی (Wacław Kuczma) لە کۆشکی هونەر لە شاری كراكۆڤی لە پۆڵەندا كرایەوە، ئەو هۆڵەی كە نمایشەكەی تێدا بەریوەچووە یەكێكە لە كۆنترین هۆڵەكانی هونەرییەكانی پۆڵەندا و مێژووی دروستكردنی بۆ 130 ساڵ پێش ئێستا دەگەڕێتەوە.
ئەم نمایشە لەژێر چاودێری نوێنەرایەتی حكومەتی هەرێمی كوردستان لە پۆڵەندا و بە هەماهەنگی ناوەندی كوردستان بۆ هونەر و كولتور (KCAC) و سپۆنسەری گەلەری زێد ئاڕ (ZR Gallery) بەڕێوەچووە.
خانمە هونەرمەندەكان بریتی بوون لە: بەیاد فەقی ئەمین، ئیمان زۆزان، فاتیمە بەرزنجی، هیرۆ شێخە، پەری ئازاد، ریزان بێتولا، رۆژگار مەحمود مستەفا، شاینە مەحموودزادە، شەن فەیسەڵ، شریڤان سەعید جەرجیس، سنوور، سۆنیا سەعید، سۆزیار سالار و، تارا عەبدوڵا.
خانمە شیوەكارەكان بە فۆرمێكی مۆدێرن توانیان ئەو ئەزموونەی كە لە ناوەخۆیی كوردستان وەریان گرتووە تێكەڵكێش بكەن لەگەڵ بیرۆكە جیهانییەكان پیشانی ئامادە بووان بدەن.
پێشانگای خانمە هونەرمەندانی كورد لە پۆڵەندا خۆی گرتووە لە لەم چواردە خانمە هونەرمەندی كورد، كە زۆرینەیان خەڵكی هەرێمی كوردستانن، بە شێواز و بزووتنەوەی هونەری جیاواز بەشداری ئەم پێشانگایە دەكەن. هەر یەكێك لەو ژنانە لە ئاراستە و هۆشمەندییەكی بینگەییدایە لە كارەهونەرییەكانیاندا. پرسی كولتوری و كەسی و كۆمەڵایەتی و سیاسی دەوروژێنن بە ئاڕاستە و تێگەی هەمەچەشن، هەوڵێكە بۆ تیشك خستنەسەر مافە ڕەگەزییەكانیان، ناسنامەی تاكەكەسی و كولتووری و سیاسی خۆیان.
ریكخەرانی ئەو پیشانگایە بۆ میدیاكان رایانگەیاند كە خانمانی هونەرمەندی كورد، وەك بەشێك لە كۆمەڵگای ڕۆژهەڵاتی ناوین بەرلێكەوتەی ڕاستەوخۆی كێشمەكێشمە كیشوەرییەكانن. لە ڕووی بابەتییەوە پرسە كۆمەڵایەتییە كولتورییە ترادیشنەڵە داخراوەكانی باڵی بەسەر ناوچەكە دا كێشاوە كوردی بێبەش نەكردووە. ئەمەش هۆكاری سەرەكی خاڵی بەرەنگاربوونەوەی بەشێك لە هونەرمەندانی ژنی كوردە، كە لەسەر پرسی شوناس، تاكایەتی، پێگەی سیاسی و كۆمەڵایەتی و ئازادی ڕادەربرینی خۆیان هەمیشە لە ڕیزی پێشەوەی خۆڕاگری و بەرەنگاربوونەوەكاندا بوون.
ئەوەیشیان دووپات كردەوە كە خانمانی كورد جیاواز لە خانمانی تری ناوچەكە تێكەڵەیەكن لە پێكهاتەی جیاوای ئاینی و نەتەوەیی، كە خۆدەربڕینیان تەنها وێناكردنێكی سانای كۆمەڵگای ترادیشنەڵی نییە بەڵكو خۆپێناسەكردنەوە و كاركردنە لەسەر خودی خۆیان. كە بە پێكهاتەی یەكەمیان، جەستە، دەست پێ دەكات و دەنگی خۆیان واڵا دەكەن. ئەم ڕەهەندە دەربڕینخوازی و پێرفۆرماتیڤییە، لە لایەن خانمانی كوردەوە، بەشێوەیەكی ئەمڕۆیی توانراوە كاری لەسەر بكرێت لە ناوخۆی هەرێمی كوردستان و بە تاك تاك لە دەرەوەی ناوچەكەش. كاری هونەرمەندانی خانمانی كورد كەمتر ڕووناكیان دەخرێتەسەر بەجۆرێك نەبینراویێكی هەیە لە جیهانی نێودەوڵەتی هونەری ئەمڕۆدا، هونەری ڤیژوەڵ ئارتی هاوچەرخ لە كوردستان كەمترین كات بەڕووی دەرەوەی خۆیدا واڵابووە، ئەمەش نەناسێندراوێتی پێداوە و جۆرێك لە وونێتی لەو پانتاییە هونەرییە بوونی هەیە. لە كاتێكدا لە ئێستادا تەوژمێكی نوێی خانمانی هونەرمەندی كورد لە فەزای هونەریدا كاری هونەری دەكەن و بوێرانە دەست بۆ هەموو ئەو چەمكە گلۆكاڵەكانە دەبەن كە پێوستە بۆ خۆدەربڕینیان. هاوتەریب بە جیهانی دەرەوەی خۆیان پرسی ژن و ژینگە و سیستەمی سیاسی و كۆمەڵایەتی و ئاینی و ئابووری دەوروژێنن بەجۆرێك بارگاوییە بە هەردوو تێگەیشتنە لۆكاڵی و گڵۆباڵییەكە. هەر ئەمەشە تایبەتمەندییەكی جیاوازی پێ دەبەخشێت لە چاو دەرەوەی خۆیدا. میدیەمە هونەرییەكانی وەك پێرفۆرمانس و ئەنستڵەیشن و ڤیدیۆ ئارت و هێڵكاری و پەینتینگ بە شێوە ئەمڕۆییەكەی خراوەتە خزمەت بەرهەمە هونەرییەكانیان.
ئەو پیشانگایە لە رێکەوتی ٣ی نیسانی ٢٠٢٥ـەوە بۆ سەرەتای مانگی ئایاری ٢٠٢٥ بەردەوام دەبێت.
ئاریان دەرگەڵەیی – هەولێر