هونەرمەندی پەیكەرساز، چێنەر نزار سەرقاڵی پڕۆژەیەكە بۆ دروستكردنی پەیكەری شاعیرەكان بە قەبارەی بچووك تا بتوانرێت لە نێو ماڵەكاندا دابنرێت.
هونەرمەندی پەیكەرساز، چێنەر نزار ساڵانێكی زۆرە لەڕێگەی دروستكردنی پەیكەری كەسایەتییەكانەوە، توانیویەتی خزمەتێكی باشی بواری پەیكەرسازی بكات، ئێستاش سەرقاڵی پڕۆژەیەكی نوێیە بۆ دروستكردنی پەیكەری قەبارە بچووك بۆ كەسایەتییەكان بۆ ئەوەی لەنێو ماڵەكاندا دابنرێن.
چێنەر نزار بە “هەولێر”ـی راگەیاند، دوای دروستكردنی پەیكەری كەسایەتییەكان بە پێوانەی گەورە، ئامانجی لە دروستكردنی پەیكەرەكان بە پێوانە بچووكیش ئەوەیە لەڕێگەی ئەو پەیكەرە بچووكانەوە ئەو پەیكەرانە لە ماڵەكاندا دابنرێن تا ببێتە كلتور، تائێستا 6 بۆ 8 پەیكەری ئەو كەسایەتییانەی دروستكردووە ئەوانیش خوالێخۆشبووان (محەمەد عومەر عوسمانی شاعیر ناسراو بە جەنەراڵی پایز، شەهید مەلا عەلی، موفتی پێنجوێنی، حەسەن زیرەك).
ناوبراو ئاماژەی بە دروستكردنی تازەترین پەیكەری كەسایەتییەكان كرد كە موفتی پێنجوێنیە بە پێوانەی بچووك كە پێوانەی مۆدێل (٥٠ سانتیمەتر) و پێوانەی پۆرترەیت (30 سانتیمەترە) و وتی “ئامانج لە هەبوونی ئەم پەیكەرانە بە پێوانەی بچووك، پەیكەری كەسایەتییە كوردییەكان لە نێو ماڵی كوردە، بە هیوام بتوانین زیاتر و باشتر خزمەتی كەسایەتیەكانی ئەم نیشتیمانە و هونەری پەیكەرسازی بكەین”.
عەبدولغەفار عەبدوڵڵا – هەولێر