دوای ساڵێک لە وێنەگرتن و نووسینەوەی سیناریۆ بۆ بەرهەمێکی سینەمایی بە ناونیشانی (بەرازیلیە شینەکە) هونەرمەند و دەرهێنەری بواری فیلمسازی “محەمەد شێروانی” لە یەکەم ڕۆژی جەژنی قوربان لە سینەماکانی هەولێر و سلێمانی دەستی کرد بە نمایشکردنی فیلمە نوێیەکەی، کە لە نووسینی “داروین وەیس” و نواندنی “حەمە ڤاینەر” و ڕۆژگار قەهار و فیراس ئیدریس و هەدار ئەرگوشی و ئاسۆ سەدام و ئیبراهیم قادر و ڕۆژیار حەسۆ و نەوزاد فەرهاد و دنیا میلان و مازیچین ڕواندوزی و وێنەگرتنی “هاوکار فەرهاد”ە.
چیرۆکی ئەو بەرهەمە سینەماییە باس لە مێژووی هەولێر و ساڵانی هەشتاکان و سەرەتای نەوەتەکان دەکات و جوانیەکانی هەولێر و خەڵکە میواندۆست و خاکیەکەی نیشانی بینەر دەدات.
پاڵەوانی فیلمە سینەماییەکەش “تەعۆ بەستەپیازە”یە، کە خۆی و بەرازیلیە شینەکەی زۆرترین چالاکیی لەم شارە ئەنجام دەدەن و دواتریش بە مەرگی تەعۆ فیلمەکە بە کۆتا دێت.
بەپێی داتاکانی سینەمای ڕۆیال و سالم بێت ئێستا ئەو فیلمە ڕیکۆردێکی لە زۆری بینەر تۆمار کردووە، تەنانەت بەر لە نیشاندانی فیلمەکەش، ترایلەری ئەو بەرهەمە ٢٤٠هەزار بینەری لە یوتیوب هەبوو، کاتی نمایشەکانیش لە سینەمای ڕۆیال و سالم لە کاتژمێر ٢ی نیوەڕۆوە دەست پێ دەکات تا ١٠ـی شەو، لە ماوەی ئەو هەشت کاتژمێرەشدا سینەماکان جمەیان دێت لە بینەر و زۆربەی ئەوانەی فیلمەکەیان بینیوە ئاماژە بۆ ئەوە دەکەن، کە فیلمەکە پێیان وایە ئەو بەرهەمە بە فۆرمێکی جیاواز کاری لەسەر کراوە و دەستبردنە بۆ چیرۆکێکی مێژوویی ڕاستەقینە و پڕە لە داهێنان لە هونەری سینەمادا، هەروەها گەڕانەوەیەکیشە بۆ سەردەمی ئاڵتوونی و سادەیی ژیان لە هەولێر.
شیڤان شێرزاد – هەولێر