دوێنێ یه‌كشه‌ممه، نۆیەمین پێشانگای تایبەتی هونەرمەند “ئازا حەسیب قەرەداخی” بە چەردەیەک لە تابلۆ لەژێر ناونیشانی ‘هەواری هەور’ لە گەلەری میدیا کرایەوە.
پێشانگاکە 40 تابلۆی قەباره بچووک و گەورەی لەخۆوە گرتووە و هونەرمەند “جەمانە”ـی کردووەتە هەوێنی بەرهەمەکانی بۆ ئەم پێشانگا شێوەکارییە و بەشێکیش لە تابلۆکانی هەواری گەلێکن، کە ژان و ژینی بە فڵچە نەخشاندووە و تروسکەی ئومێدی لێ دەرکردووە و بینەر پەیوەست دەکات بە هونەرەوە.
پێشانگاكه له لایه‌ن به‌ڕێوبه‌رایه‌تی گشتیی ڕۆشنبیری و هونه‌ری هه‌ولێر، به‌شی شێوه‌كاری ڕێكخرابوو. تێیدا ژماره‌یه‌ك تابلۆی هونه‌ری هونه‌رمه‌ند “ئازا حه‌سیب قه‌ره‌داخی” نمایشكران.
ئازا حه‌سیب قه‌ره‌داخی، وه‌ك هونه‌رمه‌ندێكی شێوه‌كار، ئه‌مه نۆیه‌م پێشانگای تایبه‌تی تابلۆكانییه‌تی بیكاته‌وه و هه‌شته‌م پێشانگایان له شاری دهۆك كرایه‌وه.
جێی ده‌ستخۆشییه، هونه‌رمه‌ند ئازا حه‌سیب قه‌ره‌داخی، له پاڵ ڕۆڵ و پێگه وه‌زیفییه‌كه‌یدا، به‌رده‌وامه له خزمه‌تكردن به بواری هونه‌ر و نووسینه‌وه‌ی خه‌یاڵ و ئه‌ندێشه هونه‌رییه‌كانی له ڕێی فلچه و ڕه‌نگه‌وه و ئه‌مڕۆش له پێشانگاكه‌یدا ژماره‌یه‌ك له‌و تابلۆ پڕ مانایانه نمایشكرابوون، كه هه‌ریه‌كێكیان چه‌ندین چیرۆكیان له خۆ گرتبوو و له ڕێی ڕه‌نگ و وێنا به‌رجه‌سته‌كراوه‌كانه‌وه مانایه‌كی دیكه‌یان به ژیان ده‌به‌خشی.