ئاریان دەرگەڵەیی – هەولێر
فیلمی سینەمایی “ئەزموون” لە دەرهێنانی “شەوكەت ئەمین كوركی” و نوێنەری وڵاتی عێراق لە ئاكادیمیای ئۆسكاری ساڵی 2023 لە شارەكانی لۆس ئانجلێس و نیۆیۆرك لە ئەمەریكا و هەروەها لە شاری بەڕلین لە ئەڵمانیا نمایش كرا.
فیلمی سینەمایی “ئەزموون” The Exam چوارەمین فیلمی بڵندی سینەماكاری كورد “شەوكەت ئەمین كوركی”، لە بەرهەمهێنانی “مەمەد ئەكتاش”، بەرهەمی هاوبەشی هەرێمی كوردستان و وڵاتانی ئەڵمانیا و قەتەر؛ بە ئامادەبوونی “ئاوان جەماڵ” یەكێك لە ئەكتەرە سەرەكییەكانی ئەم فیلمە، بۆ یەكەمین لە چەند هەفتەی رابردوو لە شاری بەڕلین لە وڵاتی ئەڵمانیا پێشكەش كرا.
“ئەزموون” لە یەكەمین نمایشی جیهانی خۆیدا لە بەشی “پێشبڕكێی سەرەكی” Crystal Globe لە پەنجاوپێنجەمین خولی فێستیڤاڵی نێودەوڵەتی فیلمی “كارلۆڤی ڤاری” Karlovy Vary لە وڵاتی كۆماری چیك نمایش كرا و توانیی خەڵاتی فیدراسیۆنی نێودەوڵەتی ڕخنەگرانی فیلم واتە “فیپێرشی” FIPRESCI ئەم ڕووداوە گرینگ و پلە یەكەی سینەمای جیهان بەدەست بێنێت.
ئەم فیلمە كوردییە لە درێژەی بەشدارییە جیهانییەكانی خۆیدا خەڵاتی باشترین فیلمی نێودەوڵەتی لە سیوحەوتەمین خولی فێستیڤاڵی نێودەوڵەتی فیلمی “سانتا باربارا” Santa Barbara لە وڵاتی ئەمەریكا، خەڵاتی باشترین سیناریۆی بەشی “پێشبڕكێی سەرەكی” لە نۆزدەیەمین خولی فێستیڤاڵی نێودەوڵەتی فیلمی “تیرانا” Tirana لە وڵاتی ئەلبانیا، بەدەست هێناوە.
“ئەزموون” بەرهەمی كۆمپانیای “میتۆس فیلم”ـی بەرلین و كۆمپانیای “مەستی فیلم”ـی سلێمانی كە بە پاڵپشتیی وەزارەتی رۆشنبیری و لاوانی حكوومەتی هەرێمی كوردستان بەرهەم هاتووە و لە لایەن كۆمپانیای ئەڵمانی “ئارت هوود” ArtHood لە جیهاندا بڵاو دەبێتەوە.