لە گەلەری میدیا پێشانگایەکی شێوەکاری بۆ هونەرمەند سەباح پیرباڵ کردەوە
بەڕێوەبەرایەتی هونەری شێوەکاری لە گەلەریی میدیا پێشانگایەکی تایبەتی بۆ هونەرمەندی شێوەکار (سەباح پیرباڵ) بە ناونیشانی (تابلۆی پیشەوەرانی هەولێر ـ شێوەکاری و مێژوو) کردەوە و ماوەی دوو ڕۆژ بەردەوام بوو.
پێشانگاکە چەندین تابلۆی جوانی مێژوویی لەخۆوە گرتبوو، هاوکات بەشێکیش لە تابلۆکان گوزارشت بوون لە کاری پیشەوەرانی کورد و سەختیەکانی ژیان لە بەردەم پیشەوەراندا.
(ئازاد لەشکری) بەڕێوەبەری گەلەری میدیای سەر بە بەڕێوەبەرایەتی گشتی ڕۆشنبیری و هونەری هەولێر، لە لێدوانێکدا بۆ (هەولێر) ڕایگەیاند: بە خۆشحاڵیەوە گەلەریی میدیا جارێکی تر تابلۆ ڕەنگینەکانی هونەرمەندی شێوەکار (سەباح پیرباڵ)ـی لە ئامێز گرت، کە گوزارشت بوون لە کار و بەرهەمی پیشەوەرانی کورد و ئاستەنگەکانی ژیان لەبەردەم داهێنان و خزمەتکردنی خەڵکدا، جگە لە چەند تابلۆیەکی مێژوویی هونەری شێوەکاری کە بە خامەی ڕەنگین و سەلیقەی جوانی ئەو هونەرمەندە کێشرابوون و لە ماوەی دوو ڕۆژیشدا زۆرترین بینەر ئامادەیی بینینی تابلۆ ناوازەکان بوون.