سەندیکا ھونەرمەندێن کوردستانێ ل دھۆکێ نوکە کار لسەر درستکرنا پەیکەرێ پێشمەرگە و ھونەرمەند، حەسەن عەلی جەنجەر دکەت و ئەڤین حسینێ دبێژیت پەیکەر نوکە ل قوناغێن دوماھیێ یە و ب تنێ دەستنیشانکرنا جهی مایە، ئو حەسەن عەلی خەنجەر ژی دخوازیت کو پەیکەرێ وی ب جلوبەرگێن پێشمەرگاتی و کەمانچەیا وی بهێتە درستکرن و ل باژارێ دھۆکێ بهێتە دانان.
ئەڤین حسێن سەرۆکا سەندیکا ھونەرمەندێن کوردستانێ ل دھۆکێ دیار دکەت کو ب پشتەڤانییا پارێزگارێ دھۆکێ، د. عەلی تەتەری پەیکەرێ ھونەرمەندێ پێشمەرگە نوکە ژ ئالیێ پەیکەرسازەکێ کورد و یێ خودان شیاین، عومەر سالە ڤە دھێتە درستکرن و تا نوکە ژڤانێ نەھاتیە دانان ل کیڤە یان کەنگی پەردە لسەر وی پەیکەری بھێتە لادان لێ نوکە کار لسەر دھێتە کرن کو د رێورەسمەکێ ژ ھەژی دا و ل جهەکێ گۆنجایی پەردە لسەر پەیکەرێ وی بهێتە لادان.
حەسەن عەلی جەنجەر، پێشمەرگە و ھونەرمەند ژی دیار دکەت کو گەلەک یێ دلخوشە ب ڤێ چەندێ کو ھێشتا ئەو دژیانێ دا مایی و یێ ساخ ئەو پەیکەرێ خوە ببینیت و دبێژیت: بۆ من جهێ دلخوشیێ یە کو ئەز ب بەرھەڤبوونا ھەڤچەپەر و دۆست و کەسوکارێن خوە ڤێ چەندێ ببینم و یا دلخوشتر ژی ئەوە کو ئەگەر پەیکەرێ من ب جلوبەرگێن پێشمەرگە و کەمانچەیا من بهێتە درستکرن و ل باژارێ دھۆکێ ئەو پەیکەرە بهێتە دانان.