ماوەیەكە هونەرمەندی گۆرانیبێژ ماهیر ئەمین، دەستی كردووە بە سازدانی شەواهەنگ و لایڤ موزیك لە چەند هۆتێل و ڕیستورانتێكی شاری هەولێر و شارەكانی تر. ئەمەش بووە هۆی كاردانەوەی بەشێك لە میدیاكار و چالاكانی تۆڕی كۆمەڵایەتی و چەند پۆستێك دەربارەی ئەوە نووسران و هەندێكیان كارەكە بە باش و هەندێ بە نەشیاوی دەدەنە قەڵەم بۆ ئەو هونەرمەندە و پێیان وایە باش نییە كە “كەسایەتییەكی وەک هونەرمەند ماهیر” بەشداری لایڤ موزیك بكات.
ماهیر خۆیشی ڕوونكردنەوەی لە لاپەڕەكەی خۆی لە فەیسبووک داوە و زۆربەی هەوادارانی بە كۆمێنت پشتگیرییان لەو هەڵوێستەی كردووە و پێیان وایە كارێكی باشە.
هونەرمەند ماهیر ئەمین، یەكێكە لەو هونەرمەندانەیە كە ساڵانێكی زۆرە بەشێوازێكی تایبەت بە خۆی گۆرانی دەچڕێت و لەو هونەرمەندانەیە كە “پێگە”یەكی تایبەت بە خۆی لە دنیای هونەر داناوە، بۆیە بەشداریكردنی لە لایڤ موزیكدا بە لای زۆرێك لە گوێگران و تەنانەت هونەرمەندانیشەوە جێی تێڕامان بوو.
لەو بارەیەوە هونەرمەند ماهیر ئەمین بە (هەولێر)ی راگەیاند “نامەوێت مەسەلەی ڵایڤ موزیك تەنها لە مەسەلەی مادیدا كورت بكەمەوە، هەرچەندە گرنگە گۆرانبێژی كورد بە گۆرانیچڕین، پارە پەیدا بكات و هونەر ببێتە سەرچاوەی ژیانی، چونكە ئەوە خاڵێكی وەرچەرخان و پێشڤەچوونی گۆرانیی كوردی دەبێت، بەڵام لەوە گرنگتر ئەوەیە كە بپرسین: ئایا ئەگەر گۆرانیبێژی كورد لەم قۆناغەی ئێستادا لایڤ موزیك نەكات، ئاخۆ چەند مانگ جارێك یان چەند ساڵ جارێك مایک دەگرێت و گۆرانی دەڵێت؟ تەنانەت ئەگەر بڵێین با كۆنسێرت بكات، خۆ كۆنسێرتیش دەكرێ چەند مانگ جارێك بێت. بۆیە لایڤ موزیك ڕاهێنانێكی گرنگە بۆ دەنگ، هەناسە، چۆنیەتی مامەڵە لەگەڵ مایک و چەندین تەكنیكی دیكەی گوتن، كە گۆرانیبێژان تەنها بە مەشقی بەردەوام و ڕۆژانە دەتوانن فێری ببن”.
ناوبراو وتی “من لەگەڵ چەندین هونەرمەند كە لایڤ دەكەن یان نایكەن گفتوگۆم كردووە و زۆربەیان پێیان باشە بكرێت، بەڵام ڕەنگە هەموو گۆرانیبێژێک نەوێرێ ئەو تەوقە بشکێنێت، یانیش هەندێ هۆكاری كەسی ببنە ڕێگر.. كەواتە وەک پرەنسیپ هیچ كێشەیەک لە لایڤ موزیكدا نییە، دەمێنێتەوە ئەوەی كەسایەتیی گۆرانیبژەكە تا چەند خاوەنی ئەو شوێنانە وا لێ دەكات تێڕوانینێكی جوانتریان بۆ هونەر هەبێت و بەرزتر بڕواننە بابەتەكەدا. لە هەرشوێنێكیشدا پێچەوانەكەیان بینی، دەتوانن بایكۆتی بكەن و نەڕۆنەوە بۆی”.
هونەرمەندی گۆرین، گوتیشی “بەشداریی هونەرمەندانی باش و خاوەن كەسایەتی، بوارەكە بەرەو پێشتر دەبات و ئاست و جۆری كاردانەوەی خاوەن شوێنەكان و تەنانەت جەماوەری ئامادەبووانیش بەرەو باشتر دەگۆڕێت”.
بە بۆچوونی ئەم هونەرمەندە لایڤ موزیكیش وەک هەر كایەیەكی دیكە، لایەنی نەرێنییشی هەیە؛ “لایەنە نێگەتیڤەکەیشی ئەوەیە هەندێك شوێن لەڕووی سیستمی دەنگەوە بەو شێوەیە نین كە گۆرانیبێژی باش گۆرانی بڵێت؛ ئەوە نیشانەی گرنگینەدانی ئەو شوێنەیە بە هونەر”.
ماهیر ئەمین زیاتر دوا و وتی “لایەنی پۆزەتیڤی دیكەی لایڤ ئەوەیە گۆرانیبێژی ستۆدیۆ و ستەیج جیا دەكاتەوە، بۆ نموونە گۆرانبێژ هەیە بە هێزی ئامێر و ستۆدیۆ دەنگیان چاك دەكەن تا گوێگر گوێیان لێ بگرێت، بەڵام ئەوانە لە لایڤدا ناتوانن سەركەوتوو بن، چونكە سەر ستەیج تایبەتمەندیی خۆی دەوێت، ئەمە جگە لەوەی لایڤ موزیك بۆ تەكنیك و ئەدای گۆرانیبێژەكە زۆر سوودی هەیە”.
وەك ئەم هونەرمەندە باسی كرد، لە ڕووی مادییەوە گۆرانیبێژ دەتوانێت بە داهاتی لایڤ موزیک بەرهەمی نوێ تۆمار بكات، نەك مەجبووری دەستی كەسانی دیكە ببێت بۆ بەرهەمی هونەری.
ماهیر ئەمین گوتی: “لە كۆتاییدا بە كورتی دەڵێم سەنگی مەحەك ئەوەیە كە لە هەرشوێنێكدا گۆرانی و موزیک ڕێزیان لێ گیرا، ئەوا ئەو شوێنە گونجاوە بۆ گوتن. ئەگەر ڕێزیشیان نەگیرا، ئەو شوێنە نەگونجاوە، جا با كۆشكی شاهانەش بێت.”