سالار ئەسید لەگەڵ کازم ساهر بەشداری کۆنسێرتە جیهانییەکان دەکات
هونەرمەندی میوزیكژه‌ن و ئاوازدانه‌ری كورد (سالار ئەسید) لە ئاخاوتنێکدا بە تێروتەسەلی باس له ئه‌زموونی كاری هونه‌ری خۆی ده‌كات و رایده‌گه‌یه‌نێت، كه خاوه‌نی پانزە كلیپی تایبه‌تی خۆیه‌تی، هاوكات ئه‌وه‌ش باس ده‌كات، كه له‌گه‌ڵ هونه‌رمه‌ندی گه‌وره‌ی عێراقی كازم ساهردا، به‌شداری له هه‌موو كۆنسرێته‌كان ده‌كات.
سالار ئەسید، وه‌ك میوزیکژەنێکی توانا لە ژەنینی مۆسیقای کلاسیک و رۆژهەڵاتی ناوەڕاست، لە زیاتر لە ٦٠ ئەلبومی هونەرمەنداندا وەک کەمانچەژەن بەشداری کردووە، هاوکات وەک میوزیکژەن و ئاوازدانەر بۆ چەندین هونەرمەند و گۆرانیبێژ کاری لە دەرەوە و ناوخۆی کوردستان کردووە.
سالار مۆسیقای بۆ چه‌ندین پرۆگرامی سینه‌مایی و ته‌له‌فیزیۆنی تۆمار كردووه، له ناوخۆی هه‌رێمی كوردستانیش دامه‌زرێنه‌ری چه‌ندین تیپ و ئۆركێسترایه.
سالار ئه‌سید، له‌و باره‌یەوه دەڵێت: “یەکترناسینی من و هونه‌رمه‌ند كازم ساهر ده‌گه‌ڕێته‌وه بۆ ساڵانی هه‌شتاكان، ئه‌وكات من له په‌یمانگای هونه‌ره جوانه‌كانی به‌غدا خوێندكار بووم، له ته‌له‌فزیۆنی به‌غدا پێكه‌وه كارمان ده‌كرد و به‌شداری كۆنسرێته‌كانمان ده‌كرد”.
گوتیشی: “هونه‌رمه‌ند كازم ساهر ئه‌وكات وه‌ک ئێستا ناسراو نه‌بوو، پاشان من چوومه ئه‌وروپا خه‌ریكی خوێندن و ژیانی ئاسایی خۆم بووم، له ساڵی 2012 جارێكی تر گروپه هونه‌رییه‌كه‌ی كازم ساهر په‌یوه‌ندییان پێمەوە كرده‌وه و داوایان لێ كردم بگه‌ڕێمه‌وه بۆ گرووپه‌كه‌یان و له دوای سه‌رهه‌ڵدانی كۆرۆناشه‌وه له هه‌موو كۆنسرێته‌كانی هونه‌رمه‌ند كازم ساهردا به‌شدارم”.
ده‌شڵێت: “هیچ كۆنسرێتێكی هونه‌رمه‌ند كازم ساهر له شه‌شهه‌زار بینه‌ر و هه‌وادار كه‌متر نییه”.
سالار ئه‌سید باسی له‌وه‌ش كرد، تا ئێستا سێ به‌رهه‌می سیدی خۆی هه‌یه، نزیكه‌ی ١٥ كلیپی خۆی هه‌یه و له یوتیوب دایناوه.