ماكوان عێزهت – هەولێر
لە چوارچێوەی کارنامەی کابینەی نۆیەمی حکومەتی هەرێمی کوردستان بۆ گەیاندنی خزمەتگوزاریی یەکسان و پەرەپێدانی کەرتی تەندروستی، بەڕێوبەرایەتی گشتی تەندروستی گەرمیان ئاماری چالاکییەکان و دەستکەوتەکانی بەشی تاقیگەکانی بۆ ساڵی ٢٠٢٥ ڕاگەیاند. بەپێی ئامارەکان، ئەو ساڵە بە وەرچەرخانێکی گرنگ لە دابینکردنی ئامێری پێشکەوتوو و کردنەوەی ناوەندی نوێ دادەنرێت.
لە ماوەی یەک ساڵی ڕابردوودا چەندین ئامێری پێشکەوتووی تاقیگەیی بۆ ناوەندە تەندروستییەکانی سنووری ئیدارەی گەرمیان دابین کراون. ئەم هەنگاوە بە ئامانجی:
• باشترکردنی کوالێتی پشکنینەکان: کەمکردنەوەی کات و زیادکردنی وردی ئەنجامی تاقیکردنەوە پزیشکییەکان.
• کەمکردنەوەی بارگرانیی سەر هاووڵاتیان: تاوەکو پێویستیان بە سەردانی دەرەوەی ناوچەکە نەبێت.
• گەشەپێدانی یەکسان: گەیاندنی خزمەتگوزارییەکان بۆ سەرجەم قەزا و ناحیەکانی گەرمیان بەبێ جیاوازی.
جێی ئاماژەیە، ئەم پڕۆژانە بەشێکن لە پلانی وەزارەتی تەندروستی بۆ نوێکردنەوەی ژێرخانی ناوەندە پزیشکییەکان و دابینکردنی نوێترین تەکنەلۆژیا بۆ خزمەتکردنی زیاتری خەڵکی ناوچەکە.
پەرەپێدانی ژێرخانی تاقیگەیی و کردنەوەی سەنتەری نوێ
لە ماوەی ساڵی ڕابردوودا، کەرتی تاقیگەکان فراوانبوونی بەرچاوی بەخۆوە بینیوە، لەوانە:
• بەڕێوەبەرایەتی تاقیگەی تەندروستیی گشتیی گەرمیان کرایەوە و سەرجەم پێداویستی و ستافی بۆ تەرخان کرا.
• سەنتەری گواستنەوەی خوێن لە گەرمیان: وەک پڕۆژەیەکی ستراتیژی کرایەوە و بە تەواوی کەلوپەلەکانەوە خرایە خزمەت هاووڵاتیان.
• بانکی خوێن: دوو هۆبەی نوێی بانکی خوێن لە نەخۆشخانەکانی (گشتی فێرکاری کەلار) و (فریاکەوتنی شەهید هەژار) کرانەوە.
• ناوەندە تەندروستییەکان: تاقیگەی نوێ لە بنکەکانی (گردەگۆزینە، ئاشتی لە شاری مامۆستایان و بنکەی تەندروستی زانکۆی گەرمیان) کرانەوە.
دابینکردنی ئامێری پێشکەوتوو و تەکنەلۆژیای سەردەم
بۆ یەکەم جار و بە مەبەستی بەرزکردنەوەی ئاستی پشکنینەکان، چەندین ئامێری جیهانی دابینکراون:
• دابینکردنی ئامێری پشکنینی مادە کحولی و بێهۆشکارەکان بۆ مەڵبەندی پزیشکی دادوەریی کەلار.
• دابینکردنی ئامێری ڤایرۆساتی جۆری (Maccura 800i) بۆ سەنتەری گواستنەوەی خوێن و تاقیگەی نشینگە.
• دابینکردنی ئامێرەکانی پشکنینی کیمیا لە جۆری (Fuji) و (Biolis 30i) بۆ مەڵبەندی سەرقەڵا و سەنتەری گورچیلەی دەستکرد.
ڕێکخستنی کەرتی تایبەت و پەرەپێدانی مرۆیی
تەندروستیی گەرمیان تەنها لە کەرتی گشتیدا نەوەستاوە، بەڵکو چاودێری و پەرەپێدانیشی کردووە بە:
• مۆڵەتدان: پێدانی مۆڵەتی فەرمیی وەزارەت بە زیاتر لە (١٨) تاقیگەی تایبەت.
• ڕاهێنان: ئامادەکاری بۆ کردنەوەی “خولی یەکەمی تاقیگەکان” لەسەر ئاستی بەڕێوبەرایەتی گشتی بۆ بەرزکردنەوەی توانای کارمەندان.
• تەندرەکان: دابینکردنی پێداویستی تاقیگەیی بۆ سەرجەم دەزگاکان لە ڕێگەی سیستمێکی شەفافی تەندەرینگ و گرێبەستە گشتییەکانەوە.
ئەم هەنگاوانەی تەندروستی گەرمیان نیشانەی بایەخدانی وردە بە ژیانی هاووڵاتیان، تاوەکو چیتر نهخۆش بۆ پشکنینی ورد ڕوو لە شارەکانی تر نەکەن.