کێشەی هەڵگەڕانەوەی ترشەڵۆکی گەدە و چۆنیەتیی چارەسەرکردنی
گەڕانەوەی ترشی گەدە بۆ سورێنچک بەهۆی گەڕانەوەی پێکهاتەکانی ناو گەدە دەبێت بەپێچەوانەی ئاراستەی ئاسایی ئەویش بەهۆی کێشەیەک لە شوێنی بەیەکگەیشتنی سورێنچک و گەدە.
د.محەمەد کاکەبرا پزیشکی نیشتەجێی دێرینی نەخۆشییەکانی هەناو، هۆكارەكان و دەرهاویشتەکانی و چارەسەر كردنی ئەو نەخۆشییە دەخاتە ڕوو.
د.محەمەد کاکەبرا سەرەتا ئاماژە بە هۆکارەکانی تووشبوون بەم نەخۆشییە دەكات كە بریتییە لە: (جگەرەکێشان، مەیخواردنەوە، قاوە خواردن، خواردنی چەور، زۆر خۆری، قەڵەوی، فتقی دیواری نێوان گەدەو سورێنچک، جل و بەرگی تەسک، سکپڕی)
د.محەمەد کاکەبرا ڕوونیشی دەكاتەوە كە دەرمان (بەتایبەت دەرمانە ئازار شکێنە نا ستیرۆیدییەکان و هەندێک دەرمانی دژە خەمۆکی و حەبی ئاسن و هەندێک دەرمانی تایبەتی تر) هۆكارن یانیش هەندێک نەشتەرگەری کە بۆ تێکچوونی جوڵەی سورێنچکەوە دەکرێت.
لە بارەی دەرهاویشتەکانی گەڕانەوەی ترشی گەدە بۆ سورێنچک د.محەمەد کاکەبرا دەڵێت:
*هەوکردنی سورێنچک یان هەندێک جار برینی سورێنچک دروست دەکات لە ئەنجامی زۆری هەوکردنەکە.
- تەسکبوونەوەی دیواری سورێنچک.
*گۆڕانی نائاسایی پێکهاتەی شانەیی لە سورێنچک بە شێوازێک بە بگونجێت لەگەڵ ئەو ترشەدا (گۆڕانەکە مەترسیدارە و لەوانەیە پێویست بکات پارچەی لێ وەربگیرێت بۆ پشکنینی شانەزانی). - خوێنبەربوونی سورێنچک.
*کەمخوێنی. نیشانەکانی گەڕانەوەی ترشی گەدە بۆ سورێنچک ئەمانەن:
*دڵەکزە: باوترین نیشانەیەتی، سوتانە ئازارێکە لە پشتی کۆڵەی سنگ ەوە دروست دەبێت بە بە خۆچماندنەوەی کەسەکە بۆ پێشەوە و خواردنەوەی گەرم سووتانەوەکە زیاد دەکات، بە بەکارهێنانی دژە ترشی هەستکردن بە سوتانەوەکە کەم دەکات.
*بوونی شلەی لیک لەناو دەم بە بڕێکی زۆر. - گەڕانەوەی ترشی و هەستکردن بە ترشی لەناو دەمدا.
*دڵتێکچوون و هەندێک جاریش ڕشانەوە. - بوونی کۆکە بەتایبەت لە شەواندا، هەندێک جاریش خیزەی سنگیان لەوانەیە هەبێت لەو کاتەی کە خواردنەکەی ناو گەدە دەگەڕێتەوە هەندێکی بچێت بۆ سییەکان و هەووکردنی سییەکان دروستبکات.
لە بارەی دەستنیشانکردنی نەخۆشییەكە د.محەمەد کاکەبرا گوتی:
بە پشکنین و بینین دەبێت لەلایەن پزیشکی پسپۆڕی هەناوی یان پسپۆڕی ووردی نەخۆشییەکانی هەرس و جگەر وە هەروەها دەستنیشانکردنی یەکجارەکی بە هەناوبینی (نازوور)ی گەدە دەبێت.
چارەسەریشی بریتییە لە:
- گۆڕینی شێوازی ژیان؛
- سەرینی تۆزێک بەرزتر بەکار بهێنیت.
- کەمکردنەوەی کێش.
- ئەگەر لە سەر سیسەم دەخەوێت دەبێت بەشی سەرەوەی سیسەمەکەی کەمێک بەرزتر بێت لە بەشی خوارەوەی تا ئاستی گەدە نزمتر بێت لە ئاستی سورێنچک و خواردن پیایدا نەگەڕێتەوە بۆ سورێنچک.
- لە سێ کاتژمێر پێش خەوتنەوە هیچ نەخوات.
- خۆ بەدوورگرتن لەو خواردنانەی کە دڵەکزەی بۆ دروست دەکەن و بێتاقەتی دەکەن.
- لەبەر نەکردنی جلی تەسک و نەبەستنی قایش بەتوندی یان هەر هۆکارێک کە پەستانی لەسەر گەدە زیاد دەکات.
- بەکارهێنانی ئەو دەرمانانەی کە پزیشکی پسپۆڕ ڕێنمایی دەکەن تایبەت بەم نەخۆشییە.
- ئەگەر هۆکاری نەخۆشییەکە تەسکبوونەوەی بەشێکی سورێنچکی بوو ئەوا پێویستە بە بەردەوامی چارەسەری پێویست وەربگرێت لەلایەن پزیشکی پسۆڕەوە.
- نەشتەرگەری وەکو کۆتا چارەسەر ئەگەر بە ڕێگاکانی پێشوو هیچی چارەسەر نەبوو.