وەرگێڕان: سەردار هێتوتێ
هەبوو، نەبوو، کەس ژ خۆدێ دلۆڤانتر نەبوو.
ڕۆژەک ژ ڕۆژێن وەرزێ پاهیزێ، خاتینا نیگار خۆ ژ بۆ چوونا قوتابخانێ بەرهەڤدکر، وێ پشتی تێشت خاری و خاترا خۆ ژ دایکا خۆ خاستی، بەرەڤ قوتابخانێ دا ڕێ و دەما گەهشتیە قوتابخانێ سڵاڤکرە هەڤال و مامۆستایێت خۆ.
مامۆستایا وان بەرپەرەکێ سپی دا دەستێ هەمی قوتابیان و لژێریا پۆلێ ڕاوەستا، و پاشان دووبارە ب چاڤێت پری حەژێکرن ل گشت قوتابیان نێری و گۆتە وان:
زارۆکێت من یێن خۆشتڤی هوین هەمی لسەر وی لاپەرێ سپیێ د دەستێ وەدا هیڤی و ئارەزویێن خۆ بنڤیسین و پاشان بێخنە دناڤا ڤێ بۆخچکێ دا.
دگەل گۆتنا مامۆستایێ هەمی قوتابیان دەست دا پێنڤیسی و هەر ئێکی هیڤیێن خۆ دنڤیسین.
پشتی ئەو دەمێ بۆ هاتیە دیارکرن تمامبووی، ئەو بۆخچکا لسەر مێزێ تژی هیڤیێن نڤیسکی بوون.
هەمی زارۆکان ناڤێ وێ بۆخچکێ کرە بۆخچکا هیڤیان.
ڕۆژا پاشتر مامۆستایا نیگارێ، بۆخچکا هیڤیا ڤەکر و ئێک ئێکە ئەو ئارەزویێن قوتابیێن خۆ دخاندن و بۆ خۆ دگۆت: واو، هیڤیێن ڤان چەند جوان و بچویکن، ئێکێ نڤیسیبوو من بیکەک دڤێت، ئێکا دیتر نڤیسیبوو من چەنتەکا پیڤازی دڤێت، من پێلاڤەکا جوان دڤێت، من پایسکلەک دڤێت.
مامۆستایێ دەما ئەڤ هیڤیە دخاندن ژدل دگرنژی و ڕابوو ئەو بۆخچک بر و چوو فرۆشگەهێ.
مامۆستایا نیگارێ دەست دا کرینا وان کەلوپەلێت بۆ قوتابیا بووینە هیڤی و ڕۆژا پاشتر ب دلەکێ خۆشڤە بەرەڤ پۆلا خاندنێ چوو، و ب چاڤێن پری دلۆڤانی ل قوتابیا نێری و گۆتە وان: من چ زارۆک نینە، لێ ئەز گەلەک حەز ژ هەوە دکەم. گەلی زارۆکا کانێ بلەز چاڤێت خۆ بگرن چونکی من سۆپرایزەک بۆ هەوە هەیە.
گشت قوتابیان ب دلەکێ پری هەیەجان چاڤێن خۆگرتن و مانە چاڤەرێ کانێ دێ مامۆستایا وان چ سۆپرایز هەبیت.
دەما زارۆکا چاڤێت خۆ ڤەکری، ژ کەیفان دا ل هەوارا دا چونکی ئەو تشتێن ڕۆژا بەرێ بۆ وان وەک هیڤیەکێ بوون د نۆکە دا یێن دناڤ دەستێن وان دا.
ب تنێ چ تشتەک دناڤا دەستێن نیگارێ دا نەبوو، چونکی وێ هیڤیەکا دیتر هەبوو، وێ ساخلەمیا برایێ خۆ دخاست، برایێ نیگارێ تۆشی نەخۆشیا گران ببوو.
مامۆستایا نیگارێ پشتی وانەیا وان بدوماهیک هاتی بانگی نیگارێ کر و پێکڤە بەرەڤ ماڵا وان چوون، مامۆستایا نیگارێ دگەل دایک و برایێ وێ بەرەڤ نەخۆشخانێ چوون و گشت تیچوونێن نەخۆشیا برایێ نیگارێ دان.
د نۆکە دا نیگار ژی وەکی هەمی زارۆکێن دیتر یا ب کەیفە چونکی برایێ وێ ب سلامەتی ڕابوویەڤە.
بۆخچکا هیڤیا، بۆخچکەکا گەلەک باشبوو،
چونکی هەمی زارۆک گەهشتنە هیڤی و ئارەزۆیێت خۆ، و گشت زارۆکا زێدەتر ژ جاران ڤیانا مامۆستایا خۆ یا بیرکاریێ هەلگرت و ڕۆژانە هەمی قوتابی ل هیڤیا وانەیا بیرکاریێ و مامۆستایا وێ بوون.
مامۆستایا بیرکاریێ ژی ژکارێ کو ئەنجامدای دلخۆش ببوو، و بکەیفڤە ژیانا خۆ دبووراند.
چیرۆکا مە بدوماهی هات
مە هیڤیە مامۆستایا بیرکاریێ ژی بگەهیتە هیڤیا خۆ.