دلۆڤان هالۆ – زاخۆ
کاڕۆژ نزار، مامۆستایێ وانا بیرکارییێ ل قۆتابخانا زاخۆ یا نێڤدەولەتی سابیس د دیدارەکێدا بۆ ڕۆژناما “هەولێر” دیار کر کو گەلەك جاران بیرکاری بتنێ وەکو بابەتەکێ تەکنیکێن سەیر دهێتە دیتن کو پەیوەندی ب ژمارەیان و ژمێریارییێ و ڕێسایێن تایبەت ڤە هەنە. لێ بیرکارییێ مفایێن سۆزداری و دەروونی ژی هەنە، چونکی فێربوون و زاڵبوون لسەر کێشەیێن سەخت یێن بیرکارییێدا دبیتە ئەگەرێ دەردانا هۆرموونێ دۆپامینێ کو ماددەیەکێ کیمیایی یێ پاداشتا مێشکییە، ئەڤە ژی دشێت هاریکار بیت بۆ پەرەپێدانا خۆڕاگریێ و بهایێ بەردەوامییێ و چارەسەرکرنا ئاریشەیان بهێزتر لێ بکەت.
مامۆستایێ ناڤهاتی ئاماژە ب وێ چەندێ ژی کر کو ل دەمێ مرۆڤ هاوکێشەیەکا سادە یا بیرکارییێ شیکار دکەت یان ب ڕێکا تیۆرێن ئالۆز یێن زەحمەت کار بکەت، بەشێن جیاواز یێن مێشکی چالاك دبن و ل دەمێ کو مرۆڤ د کاودانەکێ دەروونیدا بیت مێشك دشێت بلەز و داهێنەرانە هزر بکەت و ئاریشەیان ب شێوەیەکێ کاریگەر چارەسەر بکەت، چونکی بیرکاری مێشکی نەچار دکەت خوە دگەل نەخش و چوارچوڤەیێ نوودا بگونجینیت، بۆ نموونە ل دەمێ گۆهورین لسەر بابەتەکێ وەکو ژماره و ئەندازە و ژمێریاری چێ دبیت مێشك دشێت شێوازێ هزرکرنا خوە ڕێک بێخیت ئەڤە ژی گۆهورینا ئاستەنگان د زانینێدا بەرەڤ پێش دبەت. بڤی شێوەیی بیرکاری بتنێ مرۆڤی فێری کارامەیا ژمارە و ڕێسا و ئەندازەیێ ناکەت، بەلکو دشێت دەروونی پەروەردە بکەت بۆ ب ڕێڤەبرنا ڕەوشا ئالۆز و ڕاستەقینە یا جیهانێ.
گۆت ژی: “بیرکارییێ کاریگەریەکا مەزن لسەر مێشکێ مرۆڤی و شێوازێ هزرکرنێ هەیە. ب چەندین شێوەیان کاریگەری لسەر پڕۆسەیا زانینێ و هەر تشتەکێ دی هەیە د چارەسەرکرنا ئاریشەیاندا، چونکی گەلەك جاران بیرکاری ژ ژمارەیان و ژمێریارییێ و ڕێسایان مەزنترە. بیرکاری مێشکی چالاک دکەت و شیانێن چارەسەرکرنا ئاریشەیێن لۆژیکی بهێزتر دکەت، ئو د نیاسین و دانانا پلانێدا بۆ گەشەکرنا سۆزدارییێ و دەروونی ژی ڕۆلێ خوە دگێڕیت. بیرکاری مێشکی ب شێوەیەکێ وەسا ئاراستە دکەت کو کارێن زانینێ باشتر لێ دکەت و سەرنج و بیردانکێ بهێز دکەت.”