كتێبخانەی ناوەندی زانكۆی سەلاحەدین: سایەیەك كە چەندین سەرچاوەی گرنگ و دەگمەن لەخۆ دەگرێت

بەڕێوەبەرایەتی كتێبخانەی ناوەندی زانكۆی سەلاحەدین زیاتر لەسەد هەزار كتێب و سەرچاوەی زانستی لەخۆدەگرێت كە ماستەرنامەو دكتۆرانامە لەخۆ دەگرێت، بۆ لەنزیكەوە ئاگاداربوون لەو بەڕێوەبەرایەتیە دیدارێكی ڕۆژنامەوانیمان لەگەڵ مامۆستا “ڕزگار جەمیل” بەڕێوەبەری كتێبخانەی ناوەندی زانكۆ ساز دا.

لە دەستپێكی قسەكانیدا لەبارەی مێژووی دامەزراندنی كتێبخانەی ناوەندی زانكۆوە گوتی: “سەرەتا كتێبخانە پێگەو كۆلەگەیەكی گرنگی زانكۆیە دوای باڵەخانە و ستافی وانەبێژ و کارگێڕی و تاقیگەكانە، دیارە مێژووی كتێبخانەی ناوەندی زانكۆ بۆ سەرەتایی دامەزراندنی زانكۆی سلێمانی دەگەڕێتەوە، كە شەستەكانی سەدەی ڕابردوو دوای گواستنەوەی بۆ شاری هەولێر سەرەتایی ساڵانی هەشتاكانی سەدەی ڕابردو بە ناوی كتێبخانەی ناوەندی زانكۆی سەلاحەددین، باڵەخانەكەی لای باخچەی كوردوعەرب بوو لە گەرەكی تەیراوە، دوایی گواستراوە بۆ شەقامی ئیسكان جێگەی (ئەم ڕاین مۆڵەی ئێستا) ئەو كات گواسترایەوە بۆ ئەم شوێنەی ئێستای كە مڵکی زانكۆ خۆیەتی .
سەبارەت بەسەرچاوەی كتێبەكان و سەرچاوە زانستیەكان بەڕێوەبەر دەڵێ: “سەرچاوەكانی هەر كتێبخانەیەك بۆ كۆمەڵگەی خۆی دەگەڕێتەوە،بۆیە سەرچاوەكانی تەواوی بوارەكانی مەعریفە دەگرێتەوە كە پاڵپشت بن بۆ وانەكانی قوتابیان و مامۆستایانی زانكۆ، جیا لە توێژەرو نامەی ماستەر و دكتۆراو یەكە کارگێڕیەكانی زانكۆ، چونكە كۆمەڵگەی كتێبخانەی ناوەندی زانكۆ (فەرمانبەر و قوتابی و مامۆستا و خوێندنی باڵان لەگەڵ توێژەران) كە سەرچاوەی بینراو بیستراو و دەستنووس و (دیسك) و PDF وەك گوتمان لە گشت سەرچاوەكانی مەعریفە (تیۆری و پراكتیەكان – علوم تگبیقیە) و سەرچاوە كۆمەڵاتیەكان لە یاسا و رامیاری -ئامار – ئابووری – ئیداری – بازرگانی – كولتوور و هتد.
تایبەت بەبابەت و سەرچاوە تازەكان كە تاچەند لەكتێبخانەی ناوەندی بوونیان هەیە، مامۆستا ڕزگار ئاماژەی دا: “ئێمە هەمیشە بە پشتیوانی سەرۆكایەتی زانكۆ سەرچاوەی دیارو ئەكادیمی بۆ كتێبخانە ئامادە دەكەین، وەك كڕین لە پێشەنگا نێو دەوڵەتیەكان یا لە نوسەران و دەزگاكانی وەشاندن یان دیاری و گۆڕینەوە بە دەستیان دەخەین، بەڵام دەبێت ئەوە بزانرێت بۆ سێ ساڵ دەچێت پێشەنگای نێو دەوڵتی لە هەوڵێر نەكراوەتەوە، بە هۆی باری خراپی ئابوری ئێستای هەڕێم نەكراوە، لە پێشەنگای نێو دەوڵە تیەكانی دەرەوەی هەرێم بەشدار بین و كتێب دیاری بكەین و بیكڕین، بۆیە دەخوازین لایەنی سەروی خۆمان ئاوڕێكی جدی لەم ئاریشەیە بدەنەوە، چونكە ناكرێت بۆ بەشە تازەكان و توێژینەوەوخوێندنی باڵا بە سەرچاوە كۆنەكان پشتیوان بن، بۆیە پێویستە پاڵپشتی دارایی باش بكرێین تا كتێبخانەی بەش و كۆلیژ و كتێبخانەی ناوەندیەكانی زانكۆ بە سەرچاوەی تازە و نوێ دەوڵەمەند بكرێن .
هەروەها سەبارەت بە كتێبخانەی تەكنەلۆژیا گوتی: “بوونی تەكنەلۆجیا پێویستیەكی گرنگە لە كتێبخانەو هەر بنكەیەكی دیكەی زانستی، بۆیە پێویستە بەرنامە (پرۆگرامی كتێبخانە) كۆها و یا هەر بەرنامەیەكی ناوەخۆ دابین بكرێت و پەرە بە توانای فەرمانبەرانی كتێبخانەكان بدەین لە بینینی خول و فەراهەم كردنی ئامێری پێویست بۆیان تا بتوانین بە شێوەیەكی باش و ڕاست خزمەت بە قوتابیان و مامۆستا و سوودمەندانی كتێبخانە بگەیەنین .
سەبارەت بە هاموشۆی مامۆستا و قوتابیانی زانكۆ و خوێندنەوەی كتێب و سەرچاوەكان مامۆستا ڕزگار دەڵێ: “كتێبخانەی ناوەندی زانكۆ لە خزمەت قوتابیاندایە، چونكە (ناوەرۆك)ـی كتێبخانە پاڵپشتی بابەتی وانەكانی مامۆستایانە بۆیە كاتێك مامۆستا وانە بە قوتابیان دەڵێت و چەندین سەرچاوە دیاری دەكات بۆ ئەوەی قوتابیان زیاتر لە بابەتەكە شارەزاو تێبگەن بۆیان دەستنیشان دەكات كە دوای تەواوبونی محازەرە كه بچنە كتێبخانەی بەش یا كۆلیژ یا كتێبخانەی ناوەندی زانكۆ، لێرەوە قوتابیە دیار و نوخبەكان دێنە كتێبخانە و سەرچاوەكان داوا دەكەن..