وێنەی تاڤگەیەكی باڵەكایەتی لەسەر دراوی پەنجاهەزاری نەخشێندراوە

تاڤگەی كانیبەست لە گوندی وەڵزە، سەر بە قەزای چۆمان، كە لەلایەن دەستەی گەشتوگوزاری هەرێمی كوردستان بە بەرزترین تاڤگە لە كوردستان و عێراق دیاری كراوە، بەرزییەكەی دەگاتە 36 مەتر و دیمەنێكی نەوازەی بە ناوچەكە بەخشیووە.

لە دەڤەری باڵەكایەتی سنووری قەزای چۆمان، بەهۆی ناوچەی شاخاوی و سەرنجڕاكێش، چەندین شوێنی دەگمەن و سەرنجڕاكێش و گەشتیاری لە ناوچەكەدا هەن، یەكێك لەو شوێنانە بریتییە لە تاڤگەی كانیبەست، كەوتۆتە سنووری گوندی وەڵزە، لەلایەن دەستەی گەشتوگوزاری هەرێمی كوردستان، بە بەرزترین تاڤگە لە كوردستان و عێراق دیاری كراوە و بەرزییەكەی 36 مەترە و دیمەنی نەوازە و سەرەنج راكێشی بە ناوچەكە بەخشیووە، تایبەتمەندییەكی دیكەی ئەم تاڤگەیە ئەوەیە وێنەكەی لەسەر دراوی پەنجاهەزاری عێراقی نەخشێندراوە.
بەهۆی سەرەنج راكێشی تاڤگەكە و هەڵكەوتەی شوێنەكە، لە هەر چوار وەرز بە مەبەستی ئەنجامدانی گەشت و سەیران ژمارەیەكی بەرچاوی گەشتیاران رووی تێدەكەن، بەڵام بەهۆی نزمی پلەكانی گەرما، سەرما و سۆڵەوە، لە وەرزی زستان تەواوی تاڤگەی كانیبەست، دەبێتە بەستەڵەك، بەمەش دیمەنێكی كریستاڵی جوان و سەرەنج راكێش دەبەخشی”.
وەزارەتی شارەوانی و گەشتوگوزار لە پلانی دایە بایەخێكی زیاتر بە سێكتەری گەشتوگوزار بدات، بە پێی پلان و ئاسانكارییەكانی وەزارەتی شارەوانی و گەشتوگوزار ئەمساڵ ژمارەیەكی زۆر لە گەشتیارانی پارێزگاكانی عێراق و بیانی سەردانی هەرێمی كوردستانیان كردووە”.