لوقمان مستەفا – هه‌ولێر
دوێنێ، لە هۆڵی پێشەوای شاری هەولێر، مەراسیمی رێزلێنان بۆ هونەرمەندی رۆژهەڵاتی کوردستان، شەهرام نازری بەڕێوە چوو، کە تێیدا چەندین خەڵات و دیاری پێشکەشی شەهرامی نازری کرا و دیارترینیشیان خەڵاتی رێزلێنانی وەزارەتی رۆشنبیری بوو؛ مامۆستا نازری فەرمووی ئەم خەڵاتەی هەرێمی کوردستان بە لامەوە لە گشت خەڵاتەکانی دیکەی جیهان به‌نرختره
لە وتاری ڕێزلێناندا، حەمەی حەمەسەعید، وەزیری ڕۆشنبیری و لاوانی حکوومەتی هەرێمی کوردستان، ئاماژەی بەوە کرد کە ناوی نازری وەک کوردێکی ڕەسەن لە بواری هونەردا دیار و درەوشاوەیە و خزمەت و شانازی بە هونەری کوردی دەکات، تا ئێستا زیاتر لە چل ئەلبوومی گۆرانی و میوزیکی بڵاو کردووەتەوە.
وەزیری ڕۆشنبیری، ئاماژەی به‌وەیش کرد، خەڵکی کوردستان سەربەرزن بە میوانداری و ڕێزلێنان لە هونەرمەندی گەورەی کورد، شەهرام نازری.
شەهرام نازری، لە رێوڕەسمەکەدا خۆشحاڵی خۆی بۆ خەڵاتکرانەکەی دەربڕی، گوتیشی: “یەکێک لە شانازییەکانم لە ژیانی هونەریمدا وەک هونەرمەندێکی کورد، ئەوەیە لە هەر شوێنێکی دنیا و لە هەر وڵاتێکدا توانیببێتم کارم بۆ ناساندنی فەرهەنگ و میوزیکی کوردی کردووە”.
نازری، له به‌شێكی دیكه‌ی وتاره‌كه‌یدا، روونیشی کردەوە: “هەمووتان دەزانن لە چەندین وڵاتانی دنیا خەڵاتی گەورەم وەرگرتووە، بەڵام هیچیان وەک ئەو خەڵاتە نییە کە وەزارەتی رۆشنبیری و حکوومەتی هەرێمی کوردستان پێشکه‌شمی کردووە”.
شەهرام نازری دوای پەنجا ساڵ خزمەتی هونەری کوردی دەڵێت: دوای گەشتە دوورودرێژەکانم بە دنیای میوزیکی نەتەوەکاندا، بۆم دەرکەوت ئەوەی تا ئێستا پاک و بێگۆڕانکاری و بەبێ لەدەستدانی شوناس مابێتەوە هونەری کوردییە، چونکە سەرچاوەکەی لە زمانی کوردییەوەیە.
جگە لە گوڵبارانکردنی لەلایەن هەوادارانیەوە و پێدانی خەڵاتی رێزلێنانی وەزارەتی رۆشنبیری، شەهرام نازری لەلایەن سەندیکای هونەرمەندانی کوردستانەوە، خەڵاتی زێڕینی پێشکەش کرا؛ لە کۆتاییشدا شەهرام نازری گۆرانیەکی خۆی پێشکەش بە ئامادەبووان کرد.
جێگه‌ی ئاماژه‌یه، شەهرام نازری، ساڵی ١٩٤٩ لە کرماشانی رۆژهەڵاتی کوردستان لەدایک بووە، لە نێو ماڵباتێکی هونەریدا لەدایک بووە، پێشەنگی ماڵباتەکەیان لەو بوارەدا حاجی خانی نازری بووە کە زۆربەی هونەرمەندانی کرماشانی فێری نۆتە و میوزیک کردووە.