وەزارەتی پەروەردەی توركیا، ماوەی ١٠ رۆژی دیاری كرد، بۆ ئەو كەسانەی دەیانەوێت ئەو زمانە هەڵبژێرن، كە منداڵەكانیان لە قوتابخانەی سەرەتاییەوە پێی بخوێنن، لە باكووری كوردستانیش، بە سەدان دایك و باوک، ناوی منداڵی خۆیان تۆمار كردووە تا بە زمانی كوردی بخوێنن، بەڵام كێشەی گەورە ئەوەیە، مامۆستای زمانی كوردی كەمە.
لە سەروبەندی پرسی چارەسەریدا لە ٢٠١٢، هەمان سیناریۆ هەبوو، ئەوكاتیش بەسەدان دایك و باوك ناوی منداڵەكانیان تۆمار كرد، تا بە زمانی كوردی بخوێنن، بەڵام ئەوكاتیش بە بەهانەی نەبوونی مامۆستای وانەی كوردی، ناچار گەڕانەوە سەر زمانی توركی.
لەمساڵیشدا، هەمان سیناریۆ دووبارە بووەتەوە، مامۆستای زمانی كوردی كەمە و دانەمەزراوەن و بێكارن.
حەسەن چترک، مامۆستا لە باكووری كوردستان، پێی وایە دەبێت حكوومەت بیر لەوە بكاتەوە، ئەو كەسانەی دەرچووی زمانی كوردین دایانمەزرێنێت.
ئەو دەڵێت: ”ئێستا ٧٠ دەرچووی كۆلێژی زمانی كوردی وەكو مامۆستا دامەزراون، لە كاتێكدا ٥٠٠ی تر چاوەڕێی دامەزراندن دەكەن. بە سەدان دایك و باوك، ناوی منداڵەكانیان لە قوتابخانە تۆمار كردووە و ئەو زمانەشی هەڵیانبژاردووە زمانی كوردییە، بەڵام كێشە گەورەكە نەبوونی مامۆستایە بە زمانی كوردی“.
چترك پێی وایە، ئەگەر وەزارەتی پەروەردەی توركیا راستگۆیە و مەبەستیەتی، لە باكووری كوردستان ئەوەی حەزی كرد بە زمانی كوردی بخوێنێت، پێویستە ئەو مامۆستایانە دابمەزرێنێت، كە بەشی ئەدەبیاتیان تەواو كردووە، ئەگەر ئەو هەنگاوە نەنێت، كەواتە راستگۆ نەبووە.
لە باكووری كوردستان، چالاكوانان و هەروەها سیاسییەكان، پشتگیری تەواوی پرۆسەی خوێندن بە زمانی كوردی دەكەن، كەمپینەكەیان زۆر گەورە كردووە.
بارش جەلالی، شارەزای بواری زمان لە توركیا، پێی وایە ئەگەر توركیا بیەوێت كێشەی كورد لەو ناوچەیە چارەسەر بكات، ئەو هەنگاوەی ناویەتی گرنگە، ئەویش رێگەدانە بەوەی دایك و باوكان بتوانن ئەو زمانە بۆ منداڵەكانیان هەڵبژێرن بۆ خوێندن كە خۆیان دەیانەوێت.
جەلالی دەڵێت: ”ئەگەر بتەوێت بەرەو مەدەنیەت بچیت، عەیبە رێگە لەوە بگریت نەتەوەیەك بیەوێت بە زمانی خۆی بخوێنێت، بۆیە دەبێت پشتگیری تەواوی پرۆسەی خوێندن بە زمانی كوردی بكرێت لە باكوور“.
زۆربەی پارتە سیاسییەكانی توركیا، وەكو (جەهەپە، ئاكەپە، پارتی دەوا، پارتی ئایندە)، پشتگیری خوێندن بە زمانی كوردی دەكەن، ئەمەش بە هەنگاوێكی گرنگ و گۆڕانكاریەكی گەورە دادەنرێت.