نیگەرانی لە بەرزکردنەوەی سوودی بانکی لەلایەن بانکە ناوەندییەکان و سستبوونەوەی ئابووری، کە دەبێتە هۆی کەمبوونەوەی خواست، ئەمڕۆ لەدوای کردنەوەی بازاڕەکانی ئاسیا نرخی نەوتی دابەزاند، هەروەها بۆ ماوەی دوو رۆژی یەک لە دوای یەکە، نرخی زێڕ ئاراستەی بەرەو دابەزین گۆڕیوە.
دابەزینی نرخی نەوت لەکاتێکدایە، بەرهەمهێنەرانی گەورەی نەوت وەک سعودیە و رووسیا بڕیاریان داوە تاوەکو کۆتایی ئەمساڵ نەوتی کەمتر بخەنەڕوو.
نرخی نەوتی برێنتی دەریای باکوور، بەرەبەیانی ئەمڕۆ (سێشەممە، 26-9-2023) بە بڕی 11 سەنت دابەزی و هەر بەرمیلێک بە 93 دۆلار و 18 سەنت مامەڵەی پێوەکرا و، نرخی نەوتی سووکی تەکساسی ئەمریکاش 60 سەنت دابەزی و، یەک بەرمیلی بە 89 دۆلار و 67 سەنت مامەڵەی پێوەکرا.
بەرپرسانی بانکی ناوەندیی ئەوروپا و ئەمریکا لە چەند رۆژی رابردوودا سووربوونی خۆیان لەسەر کۆنترۆڵکردنی هەڵاوسان دووپاتکردووەتەوە و رایانگەیاندووە بۆ ماوەیەکی درێژ، سوودی بانکی لە ئاستێکی بەرزدا دەهێڵنەوە.
لەلایەکی دیکەوە ئاژانسی موودیز رایگەیاندووە، ئەگەری داخرانی حکومەتی ئەمریکا و بێ بودجەبوونی، دەبێتە هۆی کەمبوونەوەی متمانە بە قەواڵە داراییەکانی ئەو وڵاتە.
سەرەڕای دابەزینی نرخی نەوت لە کاتی کردنەوەی بازاڕەکاندا، بەڵام بانکی ئوستراڵی نیوزلاندی پێیوایە، دواجار ئەو هۆکارەی کاریگەریی زیاتر لە بازاڕ دادەنێت، کەمیی خستنەڕووی نەوتە و بەو هۆیەشەوە پێشبینی کردووە نرخەکانی نەوت لە جیاتی ئەوەی بەردەوام بن لە دابەزین، بەرزببنەوە.
بانکەکە رایگەیاندووە، پێشبینی دەکات نرخی نەوت تاوەکو کۆتایی ئەم هەفتەیە لە سەرووی 90 دۆلارەوە مامەڵەی پێوە بکرێت.
نرخی زێڕ بەردەوامە لە دابەزین؛ هەر ئۆنسەیەکی بە نزیکەی 1913 دۆلارە
ئەگەری بەرزکردنەوەی سوودی بانکی لەلایەن بانکە ناوەندییەکانەوە بەهای دۆلار و سوودی سەر قەواڵەکانی گەنجینەی ئەمریکای بەرزکردووەتەوە، کە بووەتە هۆی دابەزینی نرخی کاڵا و کانزاکان و، بەو هۆیەوە بۆ ماوەی دوو رۆژی یەک لە دوای یەکە نرخی زێڕ ئاراستەی بەرەو دابەزین گۆڕیوە.
پێنوێنی دۆلار ئەمڕۆ لەدوای کردنەوەی بازاڕەکان بەردەوام بوو لە بەرزبوونەوەکانی و گەیشتووەتە 105.7، ئەمەش بەرزترین ئاستییەتی لە ماوەی 10 مانگی رابردوودا.
بەهای یەک ئۆنسە زێڕ لە کاتی کردنەوەی بازاڕەکانی ئاسیا نزیکەی 3 دۆلار دابەزی و ئێستا لە دەوروبەری 1913 دۆلار مامەڵەی پێوەدەکرێت.
لەلایەکی دیکەوە سوودی سەر قەواڵەکانی گەنجینەی ئەمریکا، کە بۆ ماوەی 10 ساڵ دەخرێنەڕوو بەرزبووتەوە بۆ 4.5٪، کە بەرزترین ئاستییەتی لە دوای ساڵی 2006ـەوە.
لەکاتێکدا ئەمانە بە هۆکاری سەرەکیی دابەزینی نرخی زێڕ هەژمار دەکرێن، بەڵام ئەگەری داخستنی حکومەتی ئەمریکا و بێ بودجەبوونی، دەتوانێت دابەزینەکانی نرخی زێڕ سنووردار بکات؛ حکومەتی ئەمریکا تاوەکو کۆتایی ئەم مانگە بودجەی هەیە و ئەگەر کۆماری و دیموکراتەکان نەتوانن رێکبکەون، لە دوای ئەو ماوەیە بێ بودجە دەبێت.