نرخی نەوت رۆژی هەینی بەهۆی بەرزبوونەوەی خواستی چین و کەمکردنەوەکانی ئاستی بەرهەمهێنان لەلایەن هاوپەیمانیی ئۆپێک پڵەسەوە بەرزبووەوە.
رۆژی هەینی لە کاتی داخستنی بازاڕەکان، نرخی نەوتی برێنت 94 سەنت بەرزبووەوە بۆ 76 دۆلار و 61 سەنت.
نرخی نەوتی سووکی تەکساسی ئەمریکاش یەک دۆلار و 16 سەنت بەرزبووەوە بۆ 71 دۆلار و 78 سەنت.
بەوپێیەش نرخی نەوت لە ئاستی هەفتانەدا بەرزبوونەوەی بەرچاوی بەخۆیەوە بینی.
نرخی نەوتی برێنت لە ماوەی یەک هەفتەدا بە رێژەی 2.4٪ بەرزبووەوە و نرخی نەوتی سووکی تەکساسی ئەمریکاش بە رێژەی 2.3٪ بەرزبوونەوەی بەخۆیەوە بینی.
توانای پاڵاوتنی پاڵاوگەکانی چین لە مانگی پێنجدا بەرزبووەتەوە و بەڕێوەبەری جێبەجێکاری کۆمپانیای نەوتی نیشتمانیی کوێت پێشبینی دەکات خواستی چین بۆ بەکارهێنانی نەوت لە چەند مانگی داهاتوودا هێشتا زیاتر بەرزبێتەوە.
نرخی نەوت هەروەها پاڵپشتی وەرگرتووە لە بڕیاری ئۆپێک پڵەس بۆ کەمکردنەوەی خۆبەخشانە کە لە دوای مانگی پێنجەوە جێبەجێدەکرێت.
سعودیە هەروەها بڕیاریداوە لە مانگی حەوتەوە ئاستی بەرهەمهێنانی خۆی خۆبەخشانە نزیکەی یەک ملیۆن بەرمیل کەمبکاتەوە.
لەلایەکی دیکەوە، نیکۆلای شولگینۆڤ، وەزیری وزەی رووسیا پێشبینی دەکات نرخەکانی نەوت بۆ نزیکەی 80 دۆلار بەرزببنەوە و جەختی لەوە کردووەتەوە کە ئاستی بەرهەمهێنانی نەوتی رووسیا تاوەکو کۆتایی ئەمساڵ رۆژانە 400 هەزار بەرمیل کەمدەکات.
هەر ئۆنسەیەک زێڕ لە نزیکەی 1957 دۆلار مامەڵەی پێوەدەکرێت
نرخی هەر ئۆنسەیەک زێڕ رۆژی هەینی بە جێگیری ماوەیەوە و بە 1957 دۆلار مامەڵەی پێوەکرا.
دوای ئەوەی هەفتەی رابردوو بانکی ناوەندیی ئەمریکا رایگەیاند، پێویست بە بەرزکردنەوەی سوودی بانکیی دەکات لە چەند مانگی داهاتوو، نرخی زێڕ تاوەکو ساڵی 1928 دۆلار دابەزی.
لە دوای بریاری بانکی ناوەندیی ئەمریکا و لە دوو رۆژی رابردوودا زێڕ هەندێک لە زیانەکانی قەرەبوو کردووەتەوە.
رۆژی هەینی نرخی زێڕ تاوەکو 1966 دۆلاریش بەرزبووەوە، بەڵام لە کاتی داخستنی بازاڕەکان دابەزیوە بۆ ئاستی کردنەوەی بازاڕ و لە دەوروبەری 1957 دۆلار بەجێگیری مایەوە.
سەرەڕای بەرزبوونەوەی نرخی زێڕ لە ماوەی دوو رۆژی رابردوودا، بەڵام هێشتا نەیتوانیوە لە سەرووی ئاستی 1930 دۆلارەوە جێگیر بێت.
لە چەند مانگی رابردوودا نرخی هەر ئۆنسەیەک زێڕ بەهۆی پێشبینییەکان بۆ سستبوونەوەی ئابووریی ئەمریکا تاوەکو 2040 دۆلاریش بەرزبووەوە، بەڵام خۆدەربازکردنی ئابووریی ئەمریکا لە سستبوونەوە بووەتە هۆکار بۆ ئەوەی خواست لەسەر زێڕ کەمببێتەوە و نرخەکانیش دابەزن بۆ خوار 2000 دۆلار.