حكومه‌تی عێراق رایده‌گه‌یه‌نێت، ژماره‌یه‌ك بڕیار بۆ جێگیرکردنی بازاڕی دراو ده‌رده‌كرێن.
باسم عه‌وادی، گوته‌بێژی حكومه‌تی عێراق رایگه‌یاند، ژماره‌یه‌ك بڕیاری نوێ بۆ چه‌سپاندنی هاوسه‌نگی له بازاڕی دراو ده‌رده‌كرێن و داڕشتنی یاسای بودجەی گشتی بۆ ساڵی 2023ـش بەمنزیکانە تەواو دەبێت.
عه‌ودای له لێدوانێكی ته‌له‌ڤزیۆنیدا گوتی: ره‌شنووسی پڕۆژه یاسای بودجه‌ی 2023 ئاماده‌یه، به‌ڵام پرسی ناجێگیری له نرخی دراو بووه‌ته هۆی دواكه‌وتنی.
گوتیشی: گۆڕانكارییه‌كانی نرخی دراو له به‌رژه‌وه‌ندی هاووڵاتییانی عێراقیدا ده‌بێت.
ئاماژه‌ی به‌وه‌شدا، محه‌ممه‌د شیاع سوودانی وه‌زاره‌تی دارایی و وه‌زاره‌ته‌كانی دیكه‌ی په‌یوه‌ندیداری راسپاردووه، بۆ ئه‌وه‌ی هه‌یكه‌لیه‌تی بودجه دابڕێژنه‌وه و ژماره‌كان له‌سه‌ر بنه‌مای نرخی نوێی دراو له ماوه‌یه‌كی دیاریكراودا ته‌واو بكه‌ن و گوتی: دوای ته‌واوبوونی وه‌زاره‌تی دارایی له جێگیركردنی ژماره‌كان به‌گوێره‌ی نرخی نوێ، پڕۆژه‌یاساكه ئاماده ده‌بێت و دوای خستنه‌ڕووی له ئه‌نجومه‌نی وه‌زیران ره‌وانه‌ی په‌رله‌مان ده‌كرێت.