حهمید قهڵادزێی
دەست هەڵگرە ئەی مردوو شۆر
تۆ نازانی،
بەسەر سەری، زەریایەك خەیاڵەوە وەستاوی؟
ئەو خەیاڵە
پڕە لە ماسی عەشق و.
كەروێشكەی حەزەكانی ژیان
دەست هەڵگرە
ئەوە تەرمی ئاسمانێكی ڕاكشاوە
پڕە لەو بەرزە فڕانەی
فرچكیان، بە تەم و ساماڵ وگریانەوە گرتووە
كە تۆ نیشتمانێك
لە كەفی دەستی خۆتا ون دەكەی
دەبێ لەوە تێبگەی،
ناتوانی ژوورەكانی خەیاڵ و.
پەیكەری ئەندێشەی مردوو تەڕ بكەی
دەست هەڵگرە!
ناشێ لە خوێنی ئەودا
مەیینی عەشقێكی كەڵەگەت و
فوارەكانی باخی عەدەن بوەستێنی
دەست هەڵگرە
نەكا، دوا وێنەی لەچاواندا هەڵگرتبێ
بەو نیازەی، لەوێ جوانتر بیشواتەوە
ئاخر لەوێ
لە نێوان شەڕاب و حۆری و ئاگردا
شوێنێك، هەر دەبێ بۆ مانەوەی ئەوانەی
سەراب شەكەتی كردوون
وەك سیزیف ـ ی ماندوو
ئاوێنەی بەختیان، بە مۆری قەدەر شكاوە
یان، پێكراوی تیری درۆن
دەست هەڵگرە
ژیان، كەوتۆتە نێوان، كە لەبەری
هاتوو و رۆیشتووی خۆمانەوە
بۆیە تۆمارەكان، هەروا زوو بەكۆتا نایەن
لەگەڵ هەموو هاتنێكا
هاوارێك بەسە بۆ گەیشتن
كە هەوری ژیان،
ئاسمانی خۆی جێدەهێڵێ
خودا، بەر لە هەر شتێك
سێبەر لە مردوو دەكاتەوە
بۆیە شۆردن، مانایەكی نامێنێ
ئەی مردوو شۆر
بە ئاوی ئێرەی تەڕ مەكە
حیكایەتەكانی ئێرە، لەوێ
باران، لە چاوی هەموو ئەوانە دادەكا
میعادی ڕۆیشتنیان نەزانی، كە چی رۆیشتن
ئەو بارانە، لە بارانی ئێرە ناچێ
ئەو بارانە، ئەوەندە ژەنگی ئێرە دەشواتەوە
تا ئاگر لە دۆزەخ كەم دەكا
ئەی مردووشۆر
دەست هەڵگرە
پاییزی 2015