نیازی حهمهعهزیز
لە شەوێکی نووتەکدا
لە چەشنی گوارەی داری بێداد
کە ملی شووشەکان دوای هەڵچۆڕانیان لار دەبنەوە
لە خەیاڵێکی ئاوسدا
ئاوس بە:
ـ خەمی سڕینی فرمێسکی بێنوایەک و
ـ خولیای دڵنەواییکردنی دایکە شەهیدێک و
ـ حەزی شادکردنی دڵی کرێکارێکی بێکار و
ـ خەندە و نەوازش بۆ پێشمەرگەیەکی کرێچی
***
پێت وا بوو
سواری (کەشتیی نووح)ـەکەی نەجمەدین مەلا و
گالیسکە مۆدێرنەکەی (جەمال عیرفان) بوویت
وات دەزانی سەرچۆپیی
شایییە نەورۆزانەکەی (پیرەمێرد)ت گرتووە و
لە حزوور نالی و سالم و کوردی
دەستەونەزەر ڕاوەستاوی
تا بە ئاسمان بڵێی:
( بگری، بگری
تا سپیکردنەوەی دڵەکان،
تا هەستانی لافاوی عیشق و
گوڵپۆشینی باخەکانی خەیاڵ،
تا شەققەی باڵەکانی شەبەنگ و
ئازادبوونی تریفە و هەتاو)
هەر بۆیەش بوو
واتدەزانی تۆ میوانی
بە لاتەوە وا بوو
هەر بەڕاستی تۆ لە شاری
تۆ لە نێو کووچە و کۆڵانی سلێمانی
***
بۆ بە تەنها ملت لێ نا؟
بە تەنهایی خۆت گەیاندە
کەرنەڤاڵی شەو و
شایلۆغانی حەسرەتی ژاکانی جوانی
بەبێ یاوەر
بێپاسەوان سەفەرت کرد
گوێت نەدایە پیرەیاوەر
فەرامۆشت کرد کۆڤان و
زام و ناسۆر و گریانی
بەڵام هاوڕێ، ئەگەر ئەمجارە چوویەوە
بێمن مەچوو
بەڵێنی ڕاستم پێ بدە
لە گەرمەی خۆشخەیاڵیدا
(منیش دێم بۆ سلێمانی( ..
زستانی ٢٠١٩