شۆرەش ژ بۆ ژیانێ یە، بۆ ژیانەکا ب سەربلندی و ژن بخۆ ژی ژیان بەخشینە واتە ژن و شۆرەش بۆ هەمان مەبەست دجەنگن هەر ژبەر ڤێ یەکێ د هەموو شۆڕەشێن کوردی دا ژنا کورد خۆ نەدایە لایەکێ و هیڤیا خلاسکرنێ بیت بەلکو ل پێناڤ دەستڤەئینانا ژیانەکا ب رۆمەت بۆ مللەتێ خۆ مل ب ملێ پێشمەرگان شۆرەش و بزاڤ کرینە، قوربانی داینە نها داژی پێکۆلا بهێزکرنا پێگەهێ خۆ د هەموو بیاڤێن ژیانێ دکەت، ژبۆ ڤێ یەکێ مە خواست نێرینا چەند ئافرەتان وەربگرین ….
مهدیا سعدلا بۆ هێلین میدیا:
گەلەک جڤاکان دا ژن ل ژێر فشار و زەختا کۆمەلگەهێ ل شیانێن وێ یێن جەسەدی و فکری و رۆحی دهێتە لادان . لێ گەر ئەم ل ژنا کورد سەحبکەین، ژبەرکو ژنا کورد خوە ژڤان قەیدێن کۆمەلگەهێ و زەخت و فشارا دەربازکرییە، و جهێ دلخۆشی و هیڤییەک کو د نوکە دا ژی ئەم هێزی ژێ وەردگرین خەبات و تێکۆشانا وێ بوویە . کو ب کەد و شیانێن خوە مل ب ملێ زەلامی د هەمی شۆڕەشێن بزاڤێن ئازادیخوازێن کوردستانێ ل هەر چار پارچا ل شۆڕەشێن ئیک ل دیف ئیک نەلادایە، ئەڤ ژی وێ ئیکێ دگەهینیت کو ژنا کورد خوە چ جار دوی بازنێ تەنگێ فکری و کەلتۆریێ مللەتێن ڕۆژهەلات نەهێلایە و هەردەم هەول دایە کو ژبلی ڤی ڕۆلێ هندە مەزن خوە بکەتە پێشەنگا ژنێن ئازادێن جیهانی ژی، فەلسەفا مەهسا ئەمینی، لەیلا قاسم و مارگریتێ، ئیرادە و بەرخودانە سەرکێشا ژنێن جیهانی دکەت، ئەڤە ژی شانازییەکە ژبوو مە وەک ژنێن کورد کو خودان رێبازەکین کو لژێر وێ ئازادی و کەرامەت و مڕۆڤ بوون دهێتە گۆری، لەورا گەر دهی چەک ب مل بووینە یان داینەموویا شۆڕەشێن چەکداری بووینە ئەڤڕۆ ژی سەرکێشێ هەمان گۆڤەندێ ینە، لێ ب قەلەم و فکر و زانین و مەعریفە.
سالیما ئەحمەد بۆ هێلین میدیا:
*ئافرەت ئێك ژ یێکھﺎتێن هەره گرنگه ل ناڤ ھﻪر كومەڵگەھەكێ دا ب تایبەت ئافرەتا كورد، ب درێژاهییا مێژوویێ رۆلەكێ بەر چاڤ د بروسێسا سیاسی دا ل هەمی جەرخاندا هەبوویه، یا خەمسار نەبوویه دبەشداریكرن و هاریكاربكرنێ دا ل هەمی قوناغێن خەبات و بەرخودانئ دا.
بەرپابوونا شورشا ئەیلولێ ل سالا 1961ێ كاربگەریەكا مەزن ل سەر جڤاكێ كوردی ب گشتی و ئافرەتا كورد ب تایبەتی كر، مل ب ملێ زەلامی ج برا یان هەڤژبن یان بابێ وێ ب هەمی هێز و شیانێن خو یا ئاماده و هاربكار بوو، ب شێوەکێ راستەوخۆ یان نەراستەوخو ل گەل ئەڤێ شۆرشێ یا پشكدار بیت.
دیسان ب ڕێیا ڕێکخراوێن ئافرەتان د بەرپابونا شورەشا گولانا پێشکەفتن خاز یا سالا 1976ێ و سەرهلدانا ساڵا 1991 شیایە رولێ خو بینیت،ژ بلی کارێ مالێ و بەرهەڤ کرن و ئامادە کرنا خارنێ بو پێشمەرگەهێن قەهرەمان و زاروکێن خو،شیایە وەک ماموستایا شورەشێ و نوژدارا شورەشێ کار بکەت و دگەل بەردەوامی دانا کارێ سیاسی.
ژڤان محمد بۆ هێلین میدیا:
جەنابێ سەرۆك و ڕێبەرێ کورد سەرۆك بارزانی هەموو گاڤان ئافرەتا کورد وەک سمبولا بەرخودانێ دایە نیاسین چونکە ل هەموو جیهانێ ئافرەت شۆرەشێ بۆ ئازادیا خۆ دکەن لێ جدا ژ وان ئافرەتا کورد شۆرەش بۆ ئازادیا مللەتێ خۆ یا کری و ئەڤ چەندە د لاپەرێن زێرین یا مێژوویا کوردان تۆمارکریە ئەڤەژی وێ چەندێ دگەهینیت کو ئافرەتا کورد ئاریشێن کلتوری دجڤاکا کوردی دا نەبووینە ڕێگربن ل بەردەم ئازادیا وێ، لێ یا من دڤێت بێژم کو شۆرەش هیچ سەردەمەکێ دوماهیك ناهێن هەر سەردەمەکێ ب فورمەکێ شۆرەش ژبۆ سەرکەفتن و پێشکەفتن و دەستڤەئینانا دەستکەفتان تایبەت بۆ مە وەک ئافرەتێن کوردستانێ بەردەوامن بۆ کوردستانەکا ب هێز و سەربەخۆ بۆ ئاڤاکرنا ئافرەتەکا بهێز. گرێدانا کۆنفرانسێ ئافرەتێن کوردستانێ پێنگاڤەکا ئومێدبەخشە دڤی سەردەمێ جیهانگیری دا ئەڤجا هیڤیا من ئەوە دەرئەنجامێن باش هەبن و دئاست خاست و شیانێن ئافرەتا کوردا چەلەنگ دابن..